Shillong, Jymmang 27: Ka Sorkar jylla kan sa pyllait ia ki Guidebook na ka bynta ki nonghikai naduh ka Klas I haduh Klas X da ka jingthmu ban pynbiang ia ki khynnah pule ba kin ioh ia ka jinghikai kaba paka.
Haba pynbna ia kane hynne ka sngi Baar, u Commissioner & Secretary ka tnad pule puthi u Vijay Kumar Mantri ula ong, ba ki Guidebook kin iarap ha kaban kyntiew ia ka rukom ai jinghikai ia ki nonghikai, kaba dei ruh shi bynta jong ka sienjam jong ka CM IMPACT jong ka sorkar jylla.
“Ka jingthaw iaki kot kiba kyrpang na ka bynta ki nonghikai ka long ban pynlah ia ki ba kin sngewthuh kumno ban ai jinghikai ia ki khynnah pule” ula ong bad ka bynrap “Ngi lah buh ia ka thong ha ka rukom ai jinghikai bad kiei ki nuksa kaba kidei ban shim, kiei ki jait jingialehkai ne jingialehkai kiba lah ban pynrung ha ka bynta jong ka jingai jinghikai. Kiei kiba ngi dei ban hikai bad kiei kita ki nuksa, kumno ban pynsuk ia ka sobjek bad ban hikai ia ki khynnah pule. Kine kidei kita kiba ngi lah buh ha ka Guidebook ha kaba ki nonghikai kin lah ban pule ia ka Guidebook bad ban hikai ha ka rukom kaba bha”.
U Mantri ula pyntip ba ka tnad pule puthi, dang shen kala pynlong ia ka prokram kaba shi bnai kaba la tip kum ka Meghalaya Class Readiness Programme (MCRP) hapoh jong ka CM IMPACT.
“(Kane ka prokram) ka long ban weng ia ka jingduna hapdeng jong ka Klas IX bad X bad ban wanrah lang ia baroh ki khynnah pule ha kawei ka kyrdan, khnang ba kin sngewthuh ia kaei kaba ki nonghikai ki ai jinghikai. Hashwa ban leit sha ki klas ban ai jinghikai ia ka lynnong kaba nyngkong, ngan hikai shwa ia ka ‘Basic’. Kaba ngi lah leh ha ka shi bnai bad kane kan sa pynmih ia ka resol ha u snem ban wan” ula ong.
Ula pynbna ruh, “Ngi ngin sa pynmih ia ka Meghalaya Learning Enhancement Programme ban iarap ia ki nonghikai ban kiew ha ka rukom ai jinghikai ka jongki lyngba ki jingai jinghikai ha kaba iadei bad ka kam hikai skul. Ngin sa ong ia ki, kiei ki jait jingialehkai kaba ki lah ban pynlong ban ai jinghikai ha ka lynti kaba dei bad kiei ki jait nuksa kaba kidei ban ai”.
Ha kaba iadei bad ka jingpynkhreh ia ka khlam Covid-19 khamtam ia kaei kaba la sdang ban sakhi hapoh ka ri, u Mantri ula ong, ba ka tnad kala long kaba la pynkhreh lada mih kano kano ka jingjia.
“Nga tharai ba ka jingai jinghikai lyngba ki Computer kala sdang ban biang bha. Bun ki skul kila don ia ki Smart Class bad ngi lah don ia ki tiat ki tar. Ka DERT kala leh ia ka kam ka ba bha ha kane ka bynta, ha kaba man la ki sobjek kila don ki jingai jinghikai da ki video. Kumta ka tnad pule puthi kala long kaba la pynkhreh lada jia ba mih kino kino ki jingjia” ula ong.
