Shillong, Jymmang 26 : Ka seng Hynniewtrep National Liberation Council (HNLC) ha ka sngi Nyngkong, kala pynrem ia ka rai ba dang shen jong ka UAPA Tribunal, bala pyniaid da u Justice Soumitra Saikia, ba pynksan ia ka hukum ka Ministry of Home Affairs (MHA) ban pynjlan sa san snem ia ka jingkhein beain ia ka Seng.
Ha ka kyrwoh, u General Secretary ka HNLC Bah Sainkupar Nongtraw ula ong “Ka rai bala pynmih ha u Jymmang 2025, kam dei kaba wad ia ka jingbishar ba hok hynrei ka dei ka kam sain pyrthei bala puson bha ban pynlong kam bymman ia ka jingiakhih laitluid jong ki trai muluk riewlum. Ka jingiai bteng ban pyntreikam ia ka UAPA ha ka HNLC ka pyni ia ka jingsheptieng jong ka Ri India ia kino kino ki jingtynjuh pyrshah ia ki bor ba ka pynjari ha ka Bri u Hynniewtrep”.
Ula kynnoh ba ka UAPA kala kylla long ka atiar ban iuhroit bala pyndonkam ym ban iakhun pyrshah ia ki kam lehnoh hynrei ban pynduhjait ia ki jingiapher jingmut ha ka synshar khadar, ki jingangnud jong ki thain bad ka sur ki trai ri trai muluk.
“Da kaba buh dak ia ka HNLC kum ka seng beain naduh u 2020, ka Ri India kala kiar ban pynbeit ia ki daw tynrai jong ka jingialeh ki Hynniewtrep : ka jingshet kylla pateng la pateng, ka jingkyntait ia ka hok ban rai hi dalade ialade, bad ka jingpyndon kam bakla ia ki briew jong ngi bad ia ki jingdon jingem jong ngi” ong u bah Sainkupar.
“Ka HNLC kam kwah ia ka lynti ban pynthut ia ka jingsuk bad ka shongsuk shongsain, ngi kwah ban pynphai biang kumjuh ia ka jinglong laitluid jong ka Bri bad ia ki hok kiba la iai kyntait na ka por sha ka por. Ngim dei ki lehnoh, ngi dei ka sur sain hima simar jong ka bri u Hynniewtrep. Ka jingialeh pyrshah jong ngi kam suhthied ha ka jingshun, hynrei ha ka histori, ka jingbishar hok bad ka jingangnud ban long laitluid hala ka jong ka bri” ula bynrap.
U Bah Sainkupar ula ong ba ki 48 tylli ki kam bymman bad 73 tylli ki jingshah kem hapdeng u 2019 bad 2024 ki dei shibynta jong ki buit treikam ba baroh ki iatip, tang ban pynheh ia ka jingkhein bad ban pynmih ia ka jingtieng ban pynksan ia ka jingthombor.
“Kiba bun na kiba shah kem ki dei ki samla ba lui lui, kiba shah kynnoh bym dei namar ka jingpynpaw ia ka jingiadon ryngkat bad ka HNLC lane ba kyntait ban iatreilang bad ki bor treikam ka ri India. Kine kim dei ki riew bymman, ki dei ki langknia jong ka Jylla kiba iohi ia ka mynsiem ieid ri hapdeng ki paid trai muluk kum ka jingma” ula ong.
Nalor kane, u Bah Sainkupar ula ong ba ka jingkynnoh ba ka HNLC kala pyndonkam ia ki rynsan social media ban pynkylla nongbud ia ki samla ka dei kawei pat ka jingpynman kaba ialam bakla. Ula kam “Ha ka jingshisha, ngi ai jinghikai bad kyrsiew thiah ia ki samla Hynniewtrep, ban pyniasoh biang ia ki bad la ka tynrai, ka khana pateng bala shah tuh bad ka hok bala ai pateng kum ki briew ba laitluid. Kaei kaba ka Ri India ka sheptieng hok kam dei ka jingiaumsnam, ka tieng ia ki jingtip. Ka tieng ia ka pateng ba kan ieng ha ka jingshai bad ka jingkut jingmut, ka pateng kaba kyntait ban nguh ban dem lane ban shah pynbiej”.
