Guwahati, Jymmang 24: Ar ngut ki nongtrei jong ka Sribhumi Central Jail ha Assam kila shah kem halor ka jingkynnoh ba ki donkti ban bat bor ia kawei ka Kynthei hapoh ka iing sah quarter jong ka jail bad kane ka jingjia kala jia ha ka por kumba 1:30 mynstep jong ka sngi Saitjain.
Kine ki ar ngut kiba la shah kynnoh ki kynthup ia u Hareswar Kalita bad u Gajendra Kalita, bad kine baroh ar ngut kidei kiba dei ha Sribhumi Central Jail. Katkum u Additional Superintendent of Police (HQ) u Pranabjyoti Kalita, u la ong ba kane ka lanot kam dei kaba shah sep ha along hynrei kadei kaba wanrah nabar sha ka quarter jong ka jail da kine ar ngut.
“Ngi la ioh jingtip ba ki don ar ngut ki nongtrei jong ka Sribhumi Central Jail kila bat bor ia kawei ka kynthei hapoh ka quarter jong ka jail, bad kane ka jingjia la iathuh ba kala jia ha ka por 1:30 mynstep bad mar mar ki ar ngut ki pulit ophisar kila leit sha katei ka jaka bad u jail superintendent u la don lypa ha ka por ba ki poi ma ki” ong u Kalita.
Shuh shuh u la ong, “Kila dep ban pyntip sha ki pulit bad kiba la wan bad kem noh ia baroh ar ngut bad ia ka case la dep ban registered. Ia ka lanot ki pulit kila phah ban leh medical examination, bad ngi dang tohkit bha ia kane ka case,”
Na ka liang ki bor ba dei khmih kila kular ba kin pynlong ka jingtohkit bajanai bad yn pynshitom jur lada lap ba ki leh bakla.
