Shillong, Jymmang 23 : U Nongialam ka Liang Pyrshah Dr Mukul Sangma ha ka sngi Thohdieng, ula byrngem ban pynlong da ki jingiakhih pyrshah ia ka Sorkar Jylla lada kam lah ban pynkylla biang ia ka rai ban ai pyniaid sha ki riewshimet ia ka Tura Medical College.
Haba niew kum ka rai ba long pyrshah ia u paidbah, u Conrad ula maham ba kane ka rai kan sa ktah jur bha lashai lashisngi.
“Nga kyntu ia ki paidbah ban iasnohkti lang bad nga ha ka jingiakhih namar ngan sa pynlong ia ka jingiakhih bad ngan sa iakren bad ki nongshonghnong bad ngin sa dawa ia ka Sorkar bad lada ka Sorkar kam shim ia ka rai kaba dei, ngin hap ban pyniaid shakhmat ia ka jingiakhih” ong une u Myntri Rangbah barim ka Jylla haba iakren bad ki nongthoh khubor.
U Dr Mukul ula pynkynmaw ba ka jingthmu ban seng ia ka Tura Medical College kum ka College ka Sorkar ka long na ka bynta ka jingmyntoi ki samla jong ka Jylla.
Ula ong ba ka don ka jingiather bak ly bak hapdeng ka kam Sorkar bad kam shimet. “Ki kam shimet ki ju pyniaid ia ki kam da kaba thung bad beh briew kaba mut ba kam don satia ka jingshngain ia ki nongtrei, ki ban iohkam ha ki kam shimet” ong une u Nongialam ka Liang Pyrshah bad bynrap “Ym tang katta ba phi sdang da ka PPP mode bad hadien phin sa pynkylla sha ka kam shimet ba pura”.
Ula iai dawa “Kumta, sa shisien nga ong ia ka Sorkar ba kan sngewbha ban pynsangeh ia ka jingai pyniaid kam sha ki riew shimet, iuhnoh ia ka brake bad pynkylla ia kane ka rai”.
