Shillong, Jymmang 23: Ka East Khasi Hills kala ioh ia ka nam kum ka “Best Team” ha ka State-Level Inter School Athletic Meet 2025 kaba long kut noh hynne ka sngi Palei ha SAI NEHU, Shillong.
Iaka State-Level Inter School Athletic Meet 2025 la pynlong naduh ka 19 haduh ka 22 tarik u Jymmang ha kaba palat 780 ngut ki samla ïalehkai na ki 12 tylli ki district ka Meghalaya, ki la ïa shim bynta ha ki 48 tylli ki jingïalehkai track bad field.
Iaka lympung la pynlong da ka Directorate of Sports and Youth Affairs ha ryngkat ka jingiatreilang bad ka Meghalaya Athletics Association ha kaba ka East Khasi Hills (EKH) ka la ioh rah iaka nam jingjop.
Ka EKH kala khur 23 tylli ki takma ksiar, 11 tylli ki takma rupa, bad 8 tylli ki takma rupa bad ka la ïoh ban khur ïa ka nam lahduh lane Best Team ha baroh ar ki kyrdan jong ki khynnah shynrang (10 tylli ki takma ksiar) bad ki khynnah kynthei (13 tylli ki takma ksiar).
Ka East Jaiñtia Hills ka la wan ba ar ha ka kyrdan jong ki khynnah shynrang da kaba khur 5 tylli ki ksiar, katba ka North Garo Hills ka la wan ba ar ha ka kyrdan jong ki khynnah kynthei da 3 tylli ki ksiar.
Ha ka sngi kut, la pynkup burom ruh ia ki nongjop ba kynthup Under-14 Best Athletes Rikangku D Sangma (South Garo Hills) bad Akangesa A Sangma (West Garo Hills), Under-16 Saidul Ali (EKH) bad Rukini RT Dkhar, Under-18 Henry Yoga Sangma bad Pringchi R Marak (kiba dei na EKH)
Ka EKH ka la jop ruh ïa ka nam Best Athlete ha 4 tylli ki Track and Field jong ki khynnah shynrang ha kylleng ki kyrdan jong ki khynnah hapoh 16 snem bad hapoh 18 snem.
Ha kane ka sngi ba kut jong ka lympung la wan shim bynta lang da Myntri ka tnat Pule Puthi u Rakkam A Sangma u ba la ïaroh ïa kane ka lympung ïalehkai bad u la ong ba kane ka lympung kan plie lad iaki samla shaki kyrdan ialehkai National.
“Ai ba kine ki takma kin ai mynsiem ïa phi ban angnud ban leh bha shuh shuh bad ban buh thong ban poi shaka National Games 2027” u la ong.
Ha kane ka sngi la ïadonlang ruh ki heh ophisar na ka tnad Sports & Youth Affairs, ki bor pynïaid skul, bad ki dkhot jong ka Meghalaya Athletics Association.
