Shillong, Jymmang 22 : U Myntri Rangbah ka Jylla Conrad K Sangma, hynne ka sngi Palei, ula leit iuhkjat ha ka shnong Pahamjula, ka shnong ba sha kyndong bha jong ka Jirang Constituency, kum shibynta jong ka prokram CM-Connect ne ka jingiakren markhmat bad u Myntri Rangbah ka Jylla.
Kane ka jingleit iuhkjat kala urlong da ka jingkyrpad jong ki trai shnong ia u Myntri Rangbah ba un tuklar lem ha kaban maramot ia u Transformer uba la iing la 18 snem mynta.
Kane ka Shnong, kaba don 77 tylli ki Longiing, kala shong dum khlem bording naduh ba bthei u Transformet ha u snem 2007.
Da ka jingtuklar jong u Myntri Rangbah, ka Tnad bording kala maramot ia une u transformer bad kala pynioh bording biang ia ka shnong tang hapoh ka lai sngi. Ki Trai shnong hapoh ka jingialam u MLA Bah Sosthenes Sohtun, kila wan kren ia u Myntri Rangbah ha ka sngi Thohdieng bala lah.
Haba poi hapoh Shnong, ki Nongshongshnong kila pdiang sngewbha ia u Myntri Tangbah ban pynpaw ia ka jingkmen bad sngewnguh ia ka jingshimkhia jong u ia ka jingeh ba ki iakynduh. Kila pynpaw ba ka jingpynioh biang ia ka bording kala long kum ka jingpyllait ia ki na ‘dujok’ haba pynpaw ia ka jingshah iehnohbein ba kila mad ha kine ki snem bala leit noh.
U Myntri Rangbah ula kubur ia ka jingiehnoh bein bad kular ia ki Nongshongshnong ba ka jingpynbeit ne ka jingweng ia ki jingeh ki paidbah kan dei ka jingbahkhlieh jong ka Sorkar.
“Kum kane ka jingiehnohbein ka dei ka bym lah ban pdiang” ula ong “Kan dei ka jingkitkhlieh jong ngi ban shah skhor bad ban weng ia ki jingeh jong ki briew jong ngi” ula ong.
Kane ka jingleit iuhkjat ka pyni ruh ia ka jingkut jingmut jong ka Sorkar ban wanrah ia ki kam pynroi pynpar sha ki shnong ki thaw bad ban pynbeit ne weng ia ki jingeh jong ki nongshongshnong kiba sah sha ki shnong ba sha kyndong. Ia kane ka jingialang la pyniaid da u Dr P Hajong, Block Development Officer (BDO) ka Jirang Constituency.
U Myntri Rangbah ula pynpaw ia ka jingsngewhun ba ula lah ban iakynduh markhmat bad ki nongshongshnong ka Pahamjula. “Ka ai ha nga ia ka jingsngewhun kaba pher bha ban don ha kum kane ka jaka ba sha kyndong jong ka Jylla, ym tang namar ba u Myntri Rangbah ula wan hangne, ym namar ba bun ki Ophisar kim ju poi hynrei nga la ioh ban iakynduh hi markhmat ia ki paidbah bad ban don ryngkat u paidbah ka Jylla ha kum kine ki jaka kyndong ban iakren ia ki jingeh ba ki iakynduh, bad ban lehkmen lang bad ki ha kum kane ka por, kaba kila ap khmh lynti la 18 snem ban iohpdiang ia ka jingkylla” ula ong.
Hashuwa kane, u MLA ka Jirang Bah Sosthenes Sohtun ula pynpaw ia ka jingsngewnguh ia u Myntri Rangbah halor kane ka jingwan iuhkjat hapoh ka shnong Pahamjula. “Ka dei ka jingkyrkhu u Blei ba u Myntri Rangbah ula wan iuhkjat ha kane ka shnong” ula bynrap bad iaroh ia ka jingpyrshang jong u Myntri Rangbah ban wanrah ia ki kam pynroi hapoh ka Jirang Constituency khamtam ka surok NEC kaba pyniasoh na 9mer sha Umsan, kaba la pynduna bha ia ka por ha ka leit ka wan.
“Ka jirang Constituency kala kylla namar ka jinglong nongialam ba radbah jong phi” ula ong haba ban jur ia ka jingdonkam ban iai theh ia ki kam pynroi khamtam ha ka liang ka surok bad ka jingsam bording sha ki shnong ki bym pat ioh bording satia hapoh ka constituency.
