Shillong, Jymmang 22 : Ka Jaintia National Council-Khliehriat Circle kala dawa ia ki bor District ka East Jaintia Hills, ba kan pynjari noh da ka ‘No Entry’ ia ki trok ha Khliehriat ha ka por leit skul bad wan skul ki khynnah ban tehlakam ia ka jingdheng kali bad weng ia ki jingma kiba ap ia ki khynnah.
Ka JNC ka pyntip ba kala ioh pdiang ia shibun ki jingujor na ki Kmie Kpa halor ki jingeh ba ki iakynduh ha ka por ba ki leit buh skul lane wan shaw skul ia ki Khun bad kumjuh ruh ki Khynnah skul namar ka jingdheng kali kaba shyrkhei na ka jing iaid jong ki trok.
Kat kum ka kyrwoh na u General Secretary Bah Symbok Baiar Sumer, ula ong ba ka jingdheng ki kali ha Khliehriat ha ka por longskul bad wai skul ka long kaba shyrkhei bha na ka jingbun palat jong ki trok kiba iaid bad kane kala ktah ia ka jingpoi biang por ki khynnah sha skul ne sha iing haba wan phai.
Ula ong ba kane ka jingiaid ki trok ka buh ruh ha ka jingma ia ka jingim jong ki Khynnah skul namar kiba bun ki hap ban kam na shiliang sha shiliang ka surok NH-06 ban poi shala ki jong ki skul bapher bapher khamtam eh ki skul kiba don ha Khliehriat.
Halor kane, ka JNC-KC kala leit ban iakynduh ia u Deputy Commissioner ka District bad dawa ki bor District kin pyntreikam noh da ka No Entry ha ki kynta ba leit skul bad wan skul ki khynnah, khnang ba kan pynsuk ia ki khynnah ban poi sha ki skul khlem kano kano ka jingslem bad ki jingma kiba ap ia ki.
U sala Symbok ula pyntip ba u Deputy Commissioner ula kular ban shimkhia ia kane ka jingdawa ka seng bad ula pynbna ruh ba ka No Entry kan sdang treikam noh naduh lashai ka sngi.
Kat kum ka jingong jong u, u Deputy Commissioner ula pynjari ia ka No Entry naduh ka por 8 baje mynstep haduh 9 baje mynstep kaba dei ka por leit skul ki khynnah bad naduh ka por 2 baje janmiet haduh ka 3 baje janmiet kaba dei ka por wai skul ki khynnah.
