Guwahati, Jymmang 22: Ki nongialam ba ha khlieh eh jong ka Bharatiya Janata Party (BJP) Assam ba kynthup naduh u Myntri Rangbah u Himanta Biswa Sarma, u Union minister u Sarbananda Sonowal bad ka Union minister of State ka Pabitra Margherita kila ia shong ka jingialang ha Jorhat ban ia pyrkhat ia ka buit trei kam na ka bynta ka jingpynkhreh ia ka Assembly Election ka ban long ha u snem 2026.
Ia kane ka jingialang ban pyrkhat ia ka buit trei kam jong ka jingpynkhreh ia ka election la pynlong ha ka sngi Balang ha Jorhat.
Katkum ka tyllong khubor na ka party, la iathuh ba u Myntri Rangbah u la ai khublei ia baroh ki nongtrei jong ka party namar ka jingtrei shitom ka jong ki hynrei u la bynrap ruh ba kane ka por ym dei ban leh kmen bad u la kyntu kylla ia baroh ki nongtrei ka party ba kin trei shitom na ka bynta pynkhreh ia ka jingleh kmen kaba khraw da kaba pyntikna ba kin ioh ia ka jingjop ha ka Assembly election kaba sah mynta satang phra bnai.
Shuh shuh u Sarma u la kyntu ia baroh na ka bynta ban pynkhlain ia ka party bad ia ki nongrim jong ka ba kynthup ha ki thain nongkyndong bad kumjuh ruh ha ki jaka sor.
Katkum ki tyllong khubor jong ka party, u myntri rangbah, ha ka jingkren jong u, u la kdew ia ka jinglong jingman jong ka sain pyrthei mynta, kynthup ia ka jingjop kaba khraw jong ka BJP ha ka elekshon panchayat kaba dang shen.
Kum shi bynta ban pynkhlain ia ka buit trei kaba dei naduh ki tynrai ne (grassroots), u Sarma u la pynbna ba 20 ngut ki samla yn sa pynrung na kawei ka booth level ban pynkhlain ia ka party.
Shuh shuh u Sarma u la kyntu ia ki Minister, ki MLA bad kumjuh ruh ia ki MP ba kin pyntikna ba ki nongtrei ka party bad kumjuh ruh ki paidbah nongkyrshan kin ia trei lang bad ki paidbah bad ban pyntikna ban pynphriang shaphang ki kam pynroi na ka bynta ka jingbha jingmiat kaba la leh da ka sorkar ba la ialam da ka BJP la ka long hapoh ka jylla ne na ka sorkar kmie.
