Shillong Jymmang 21 :Arngut ki Ophisar ka Ministry of Education (MoE) ka Sorkar Pdeng kin wan sha Shillong lashai ka sngi Palei, ba kin shong bishar kam halor ka jingtreikam jong ka North Eastern Hill University (NEHU).
Kine ki arngut ki kynthp ia u Additional Secretary in-charge Department of Higher Education, Ministry of Education Sunil Kumar Barnwal bad Director Subrat Kumar Pradhan .
Kat kum ka shithi na u Under Secretary ka Ministry DK Hmanshu bala phah sha u VC ka NEHU ha ka sngi Balang, la ong ba kine ki arngut kin sa leit iuhkjat ha NEHU ha ka 22 tarik Jymmang ban shong bishar kam halor ka jingtreikam jong kane ka University.
La kyrpad ruh ia ka Sorkar Jylla ba kan pynbiang ia ki jingdonkam baroh jong kine ki Ophisar lem bad ki bor pahara ha kane ka jingleit jong ki sha NEHU.
Ha ka 14 tarik Naiwieng 2024, ka MoE kala thaw ia ka Committee ki arngut ki dkhot ban tohkit halor ka jingkynnoh pyniaid kam bym hok bad jingbym lah treikam ki bor pyniaid ha North Eastern Hill University (NEHU).
Ia kane ka rai la shim hadien ka jingiashong shah jingit ba khlem pud jong ka North Eastern Hill University Students Union (NEHUSU) bala kyrshan da ka Khasi Students’ Union (KSU – NEHU Unit) kaba la neh haduh 10 sngi. Ia kane ka jingshah thngan la pynlong halor ka jingdawa ban weng noh mardor ia u vice chancellor Prof PS Shukla, registrar bad deputy registrar.
