Guwahati, Jymmang 17: Kumba 10 ngut ki briew kila duh noh la ka jingim bad kumba saw ngut kiwei pat kila mynsaw na ka jingpom ka leilieh ha ki bynta bapher bapher jong ka Odisha.
Ka tnad India Meteorological Department (IMD) kala pynmih ka jingmahan da ka Orange alert na ka bynta ki district bapher bapher da kaba maham ba kan don ka jinglynsho ka eriong, ka leilieh ha kine ki ar sngi ban wan.
Kane ka jingjia kala jia ha la ki jong ki district ba kynthup ha Nor’wester (Kalbaisakhi) ha kaba ka eriong bad ka leilieh kala lyngshop ha ki bynta bapher bapher jong ka jylla.
Katkum ka kaiphod, lai ngut ki briew kila iap ha Koraput, ar ngut ha Ganjam, ar ngut ha Jajpur, wei ha Dhenkanal bad u wei pat ha Gajapati districts.
Ha Koraput, na ka jingkhyrwit ka eriong la don lai ngut kiba la khlad ba kynthup ia ka longkmie ba la 60 snem ka Burudi Mandinga bad ka khun ksiew ba 18 snem ka Kasha Mandinga na ka shnong Pordiguda bad sa kawei ka lanot kaba la tip kyrteng kum ka Ambika Kashi, kaba dei ka nongshong shnong ka shnong Kumbharaguda.
Ha Ganjam, kawei ka longkmie ba dang kham rit ka rta kala khlad ha Belaguntha kaba hap hapoh Bhanjanagar, bad kawei ka khynnah ba dang rit ka rta kala duh ia ka jingim ha ka shnong Kabisuryanagar.Ha Dhenkanal, kawei ka longkmie kala khlad noh ha ka shnong Kusumandia bad u wei u briew u la mynsaw na ka jingther u leilieh ha ka shnong Kabera.
Ha Jajpur, ar ngut ki khynnah kila khlad ha ka shnong Burusahi. Ha Gajapati district la ioh khubor ba la don u wei ba khlad bad saw ngut kila mynsaw ha Mohana bad kumjuh ruh ha R. Udayagiri blocks.
