Shillong, Jymmang 16: Ka Jaiñtia Students Union (JSU) ka pyrshah jur ïa ka jingthmu ban pynlong iaka tamasa ‘Summer Jam’ kaban sa long shen ha ka 23 tarik Jymmang hajan ka Civil Hospital Ialong, West Jaiñtia Hills District.
Lyngba ka kyrwoh ka JSU ka pynpaw ba ka jingpyrshah iaka tamasa kadei namar ka jingpynlong hajan ka Hospital, kaba long pyrshah iaki kyndon ka Noise Pollution (Regulation and Control) Rules, 2000 jong ka Environment Protection Act, 1986.
Ka JSU kala kdew ba ka jingpynlong tamasa marjan bad ka Hospital ka buh jingma ia ka jingshngain jong ki paidbah, ka jinglah ban ioh jingsumar kyrkieh.
“Hadien ka jingïakynduh ïa ka Additional Deputy Commissioner jong ka West Jaiñtia Hills District, la ioh jingtip ba ka ADC kam don jingtip eiei halor kane ka tamasa bad kam don jingtip ruh la ki ïoh ne em ïa ki jingbit kiba biang na ka bynta ban pynlong ia kane ka tamasa” ong ka kyrwoh.
Ka JSU kala pynpaw ka jingsngewkhia kaba jur kumno la mynjur ia ka tamasa kaba heh khlem ka jingtip jong ki bor Sorkar.
“Ka JSU ka pyrshah jur ïa ka tnat Tourism kaba la kyrshan ban pynlong ïa kane ka tamasa khlem da pyrkhat ïa ka jingma jong ka jingkoit jingkhiah ki paidbah. Ngi kyntu iaki bor District Administration bad ka Meghalaya Pollution Control Board bad kiwei ki bor ba dei peit, ban tuklar mardor bad pynkynriah ïa kane ka tamasa sha ka jaka kaba biang khnang ba ka jingkoit jingkhiah ki paidbah kan long kaba kongsan tam” la ong ka kyrwoh.
 ka pyrshah jur ïa ka jingthmu ban pynlong iaka tamasa ‘Summer Jam’ kaban sa long shen ha ka 23 tarik Jymmang hajan ka Civil Hospital Ialong, West Jaiñtia Hills District.){kind=link}