Shillong, Jymmang 16 : Ka Iingkashari ha ka sngi Palei, kala bthah ia ka Sorkar Jylla ban thaw da ka Committee ka ban leh eiei halor ka jingma jong ki ksew surok hapoh ka Jylla.
Ka Iingkashari ba kynthup ia u Chief Justice IP Mukerji bad Justice W Diengdoh ha ka hukum bala pynmih hadien ba bishar ia ka PIL kala ong “Ka Sorkar Jylla ka dei ban shim mardir ia ka sienjam ym palat ia ka saw taiew na kane ka sngi ba kan thaw ia ka Committee kat kum ka rule 4 jong ka rule. Hadien kane, ka Committee ka dei ban trei ia ki kam kat kum ka rule 5”.
Kane kala mih hadien ba u Kaustav Paul, u nongmudui, ula kdew ba kine ki sienjam bala shim da ka Iingkashari ka lah ban nym pyni satia ba ki long kiba treikam. Ula ai artylli ki daw halor kane-kaba nyngkong ka long ba ka hukum ka long tang ia ka Shillong. Ka jingma jong ki ksew surok ka long ha baroh kawei ka Jylla Meghalaya bad kaba ar, ula kdew ia ka Animal Birth Control (Dog) Rules, 2001 kaba la pyntreikam hapoh ka sub section(1) jong ka section 38 jongka Prevention of Cruelty to Animal Act, 1960. Kane ka rule ka dang shu kut tang kum ka jingthoh bad ka ba khlem pyntreikam.
U paul ula kdew ruh ba ka rule 4 ka ailad ban thaw ia ka Committee ba kynthup ia u Commissioner/u khlieh ki bor synshar shnong, u ban dei u ex-officio Chairman, ki nongmihkhmat n aka Public Health Animal Welfare, District Society jongka Act, ki Seng iada ia ki marad bad kiwei. Ula ban jur ba ia kane ka committee dei ban thaw noh mar mar bad kan treikam kat kum ka rule 5.
Ka Iingkashari kala bthah ban ai copy ia ka mudui sha ki Commissioner jong ki District bad District Council ha ryngkat ka hukum bala pynmih da u Advocate-on-record na ka bynta ka Jylla hapoh ka shitaiew na kane ka sngi.
