Shillong, Jymmang 15 : U Nongialam ka United Democratic Party (UDP) Bah Titosstarwell Chyne ha ka sngi Balang ula khein kam kai ia ka jingdawa jong ki seng sain pyrthei ba don ha Liang Pyrshah, ban weng noh ia u Symbud Myntri Rangbah Bah Sniawbhalang Dhar na ka shuki Myntri haba pynshong nongrim ia ki jingkynnoh ka seng Hynniewtrep National Liberation Council (HNLC).
Haba iakren bad ki nongthoh khubor, u Bah Titos ula ong “Ha nga hi, ki jingkynnoh ki dei kiba lah ban leh da mano manor uh bad pyrshah iano iano ruh hynrei ka sakhi ka dei ban don. Lada phi sei ia ki jingkynnoh, phi dei ruh ban don ia ki sakhi”.
Ka HNLC ha ka kyrwoh ba pynmih ha ka 4 tarik Jymmang, kala kynnoh ba u Bah Sniawbha ula bei tyngka ia ka Seng ha ka por ba u dang bat kum u Myntri ha ka Sorkar ba ialam da ka Congress.
Haba pynshong nongrim ia kane, ki Liang Pyrshah kum ka Voice of the People Party (VPP) bad ka Congress kila dawa ia u Bah Sniawbha ban hiar shuki kum u Symbud Myntri Rangbah ban plie lynti ia ka jingtohkit halor kane ka jingkynnoh.
Haba kylli, une u Nongialam ka UDP ula ong “Ai ba ka ain kan shim ia la ka lynti ban pynshisha la ka jingkynnoh ka dei kaba shisha ne em. Kane ka shong ha ka Sorkar ban rai la ka jingkynnoh ka dei kaba hap leh eiei ne em hynrei ha nga hi ngam iohi ba kan long kaba shongkhia”.
“ta ka daw nga ong ha phi ba lada ka jingkynnoh ka long kaba shongkhia, to ngin iakren hynrei lada kam shongkhia, balei ba ngin iakren ia ka” ula bynrap.
