Shillong, Jymmang 15 : U MDC shimet ka Laban-Mawprem Bah Ricky Shullai, ula pynpaw ia ka jingbynniaw kaba jur halor ka jingbym ithuh ka Finance Ministry ka Sorkar Pdeng ia ki jaka sor kiba hap hapoh u pud u sam ka KHADC ban pyntreikam ia ki skhim a 15th Finance Commission.
Une u MDC ula leit ban iakynduh ia u Symbud Myntri Rangbah ba khmih ia ka Tnad District Council Affairs (DCA) Bah Prestone Tynsong, ba un iakren lem bad ka Sorkar Pdeng halor kane ka kam.
Haba kren sha ki lad pathai khubor, u Bah Ricky ula ong “Nga wan iakynduh ia u Symbud Myntri Rangbah ban kyrpad ba ka Sorkar Jylla kan thoh sha ka MoF ba kan mynjur ha ka ban pynbeit biang bad kynthup ia ki ADC ha ki portal jong ka khnang ba ngin ym donkam ban ioh ia ki skhim lyngba ka Municipal”.
“Ngim dei sati aka Tnad. Ngi dei ka bor synshar khadar bala ithuh da ka Riti Synshar ka Ri. Lada ka KHADC ka synshar ia ka jaka, kata ka jaka ka dei kaba hap ban ithuh ha baroh ki skhim bad portal ka Sorkar Pdeng. Lada iaid laitka dei ka jingpynkhein iaka Sixth Schedule” ula ong haba ban jur ia ka jingdonkam ban ithuh ia baroh ki kynhun hapoh ka KHADC kum ka Hima, Raid, Syiem, Dorbar Shnong bad Rangbah Shnong.
U Bah Ricky ula pynpaw ruh ia ka jingpyrshha kaba jur ha ka Dorbar ba dang shu dep jong ka Council halor kane ka kam bad dawa ba ka ADC ka dei ban paw ha baroh ki rynsan digital jong ka Sorkar Pdeng.
“Kane kam dei ka jingdawa ban myntoi ha ka sain pyrthei hynrei ka dei ka jingkhot ban bat ia ka burom jong ka riti synshar bad iada ia ka synshar khadar kaba kham per jong ki riewlum ka Meghalaya” ula ong.
Ula bynrap ba ki ADC hapoh ka Sixth Schedule ki dei kiba la pynkupbor da ka Riti Synshar ba kan synshar halor ka khyndew ka shyiap, ka khaii pateng, ka riti dustur bad ka jingithuh ba kyrpang ha Meghalaya.
“Ki jaka hapoh u pud u sam ka KHADC kynthup ki jaka sor, kim don satia ia ki ward commissioner lane ki panchayat-ki dei kiba la khmih beit beit da ki MDC. Da ka jingpyntreikam ia ki skhim digital bad rynsan geotagged kum ka PFMS, kiADC kim shym la paw satia ha kine ki portal, kaba pynslem ne pynduh iaka song pisa. Wat hapdeng kane, ka Sorkar Jylla kala rai ban pyniaid ia ka 15th Finance Commission jong ki jaka sor lyngba ki MDC-khlem da pynbeit ia ki kam ba kongsan ba iadei bad ka jingithuh iaki ADC” ong u Bah Shullai.
