Shillong, Jymmang 05: Ka samla wan nyngkong haka eksamin Class XII Arts ka Idawanplishisha Swer kala ong ba ka jingtrei shitom bad ka jingminot ka long kaba donkam eh na ka bynta ban ioh ia ka jingjop.
Ka samla Idawanplishisha Swer bad u Albert Mate jong ka St Edmund’s Higher Secondary School ki dei kiba wan hakhmat duh ha ka eksamin HSSLC MBOSE na ka bynta ka Arts stream.
Haba kren shaki lad pathai khubor ka samla Idawanplishisha ka la ong ba ka la sdang ban pule bad pynkhreh iaka eksamin naduh ba sdang long school.
“Ki don ki jingeh hynrei nga khlem pynsngew ia kita. Ki don ki por ba nga shah pynthut hynrei katba nga ioh por nga pynleit jingmut beit haka ban pule kot” ka la ong.
Haba pynpaw ba ka thong kadei ban long IAS Officer, ka Idawanplishisha ka la pynshong nongrim ia ka jingjop namar ki nonghikai, ki bor pyniaid skul bad ka la ong, “Ka skul ka don ka bynta kaba khraw ha ka jingim jong nga. Nga aikhublei ia ki nonghikai jong nga. Nga aikhublei ia ka skul kaba pynlong ia ki test bad ki eksamin man ka por. Ka skul bad ki nonghikai ki ai mynsiem ia nga ban pule”.
Haba pynksan ia ka jingdonkam ban don ia ka thong ha ka jingim, ka samla Idawanplishisha ka la ong, “Phi donkam ban buh ia ka thong ban trei shitom naduh kaba sdang jong u snem, phin sa ioh ia u soh jong ka jingjop.”
Ka samla Idawanplishisha kala iathuh ba kan dang bteng ia ka jingpule kaba kham shalor da kaba pule ia ka subject Political Science.
