Shillong, Iaiong 28 : Ka Federation of Khasi Jaintia & Garo People (FKJGP) Seng Kmie, ka pynrem jur ia ka jingshah kem u President ka North Eastern Hill University Students’ Union (NEHUSU) Sandy Sohtun bad suba jur ba dei ka jingshah pharep kaba lah ban don eiei sha lyndet ban set da u kak ia ka sur ki samla pule.
Ka kyrwoh na u Vice President Kitboklang Nongphlang, ka ong ba ka FKJGP ka sngewkhia jur ia kaei kaba jia bad pynpaw ba ka Seng kala sakhi ia ki kynrum kynram kiba mih ha ka skulbah NEHU hadien ba ka NEHUSU kala sei madan ia ki kam bamsap bad ki jingbym iaid beit iaid ryntih haduh ba poi u pud ba ki samla pule kin shah thngan khlem buh por ban weng mardor ia u Vice Chancellor.
Ka FKJGP kala kynnoh ba ka jingshim sting jong ka Sorkar Jylla ban tuklar ia katei ka kam haduh mynta mynne ka dang pyndkhoh ia kiba bun ki rukom treikam jong ka NEHU.
U bah Kitbok ula ong “Ka FKJGP ka sngew ba ka jingshah pharep u Sandy Sohtun, President ka NEHUSU lyngba uwei u Nonghikai ka skulbah, ka lah ban don kaei re kaei sha lyndet ban set da u kak na ka shyntur jong ki samla pule kiba dawa ia la ka jong ka hok ban saindur na ka bynta ka jingiaid shaphrang jong ka skulbah”.
“Ka jingrung jubor jong ki bor pulit hapoh ka campus jong ka skulbah NEHU ha ka jaka ba kan long ka jingshngaiñ kan long pynban kum ka jing pyntieng pynsmiej ia ki samla pule jong katei ka skulbah. Ka sorkar ka dei ban shimkhia mardor ia katei ka kam bad ban thung da ka kynhun tohkit ka bym noh shiliang khmat khnang ba ki jingshisha kin paw pyrthei” ula ong.
Une u Nongialam ka FKJGP ula ong ba ka Seng ka ju ioh ia shibun ki jingujor n aka por sha ka por halor ka jingshah niewbeiñ bad shah leh shiliang khmat ym tang ia ki samla pule hynrei wat ia ki nongtrei ha katei ka skulbah kiba la wan jia ha ki dur bula ki bapher bapher lyngba ka jingngeit niam bapher bapher.
“Ka FKJGP ka maham jur ia ki bor kiba nabar ba kim dei satia ban pyrshang ban ialam bakla bad ban balia siangsdieh da kaba pyrshang ban tap eitmiaw ia ki kam ba uta u Vice Chancellor u la leh ban pynjah burom ia ka NEHU ha kaba ki samla pule bad wat ki nongtrei kiba don don ka ka Skulbah NEHU kim mon shuh ia u ban dang long kum uta u khliehduh ban pyniaid ia kiei kiei baroh” ula ong.
Ula pyntip ba ka FKJGP kan sa tih tyllong ia kiei kiei baroh bad ba kan ym shong kli kti satia halor ka jinglong jingman jong ka NEHU. Ula ong ba ka FKJGP kan ym ailad ruh ba ki samla trai ri kin shu kylla long ki langkñia tang na ka bynta ka jing myntoi jong ki briew kiba nabar kiba don bynta ha ka saiñpyrthei jong ka ri India ba iar.
 Seng Kmie, ka pynrem jur ia ka jingshah kem u President ka North Eastern Hill University Students’ Union (NEHUSU) Sandy Sohtun bad suba jur ba dei ka jingshah pharep kaba lah ban don eiei sha lyndet ban set da u kak ia ka sur ki samla pule.){kind=link}