Kohima, Iaiong 27 : Ha ka jingbthah ba pynmih ha ka sngi Saitjain, ka Tnad Pulit ka Nagaland kala maham ba ym bit ban pynphriang ia ki khubor lamler ki ba lah ban pynthut ia ka jingsuk bad ka shongsuk shongsain ha ka Ri bad ha Nagaland ruh kumjuh hadien ki kam thombor ki lehnoh ha Pahalgam.
Kala ong ba kin don beit ki bor ba pyrshah ia ka Ri India ki ban pyrshang borbah ban pynphriang ia ki khubor lamler ki ban wanrah pynthut iaka shongsuk shongsain ha ka Ri.
Ka jingbthah ka ban jur ba ki rynsan social media kum ka YouTube, Facebook, Instagram bad X ki lah ban shah pyndonkam bakla ban pynphriang ia ki khubor ba shu thaw, khamtam da ka jingiarap jong ka Artificial Intelligence.
Kala ong ruh ba bun na kine ki jingthoh ha ki social media ki dei kiba pyniaid da ki briew na Pakistan lane ki agent jong ki bad ki ju download bad pynphriang ia ki sha ki riew paidbah ki bym tip ia ka duh ka dang.
Haba kyntu ban husiar, ki Pulit kila kyntu ia baroh ki nongshongshnong ba kin pynshisha shuwa ia kino kino ki khubor ne ki jingtip ba ki ioh na ki social media shuwa ba kin iarap pynphriang lem ia ki.
“Sngewbha wat ia pynphriang ia kino kino ki jingthoh kiba lah ban pynthut ia ka jingshongsuk ha ka Jylla” ong ka jingbthah.
