Shillong, Iaiong 25 : Ka North Eastern Hill University (NEHU) kala rai ban thung da ka Inquiry Committee ka ban tohkit halor ka jingshah shoh jong u Professor Dr Alok Singh hala ka jong ka Ophis ha ka janmiet 24 tarik.
“Na ka bhynta ka Vice-Chancellor Incharge Prof SM Sungoh bad ki bor pyniaid, ka University ka pynrem jur ia kano kano ka kam thombor ha phyllaw ka skulbah” ong u NEHU PRO Dr Davidson Pyngrope ha ka kyrwoh.
“La wanrah sha ka jingtip jong ki bor pyniaid ba u Nonghikai jong ka skulbah ula shah shoh ha ki katto katne ki riew runar. Une u nonghikai ula ujor ia ka ejahar ha Mawkynroh Police Outpost. Mynta kane ka kam kala don ha ka kti jong ka Tnad Pulit bad ka jingtohkit kan iaid hala ka jong ka lynti” ula bynrap.
U Dr Pyngrope u pyntip ba ka University kan sa thung ruh ia ka Inquiry Committee ka ban khmih ia kane ka kam.
“Ngi kyntu ia ki paralok ka skulbah, kynthup ki samla pule, ba kin sngewbha ban pynneh pynsah ia ka jinglong ba bha jong ka skulbah” ula ong.
Nalor kane, ka bor pyniaid kala kular ruh ba ka jingshngain jong ki nonghikai, ki nongtrei bad ki samla pule ka dei kaba kongsan tam hakhmat ki bor pyniaid ka skulbah.
