Shillong, Iaiong 24: Ka Meghalaya BJP hynne ka sngi Palei kala pynlong ia ka jingialang sngewlem ban leh burom ia u Kpa Bakhuid Pope Francis.
Ki nongialam ka seng kiba dei na ki niam bapher bapher kila wan iashimbynta ha kane ka jingialang sngewlem ia kaba la ialam da u President ka BJP Meghalaya u Rikman G Momin bad u Myntri Sorkar u Bah A.L. Hek.
Kum ka dak jongka jingburom ia u Pope Francis, ka seng BJP hapoh ka jingialam u Rikman G Momin, kila pynlong ia ka jingbuh jingduwai kyrpang, ha kaba ki briew na ki niam bapher bapher kila wan ban buh jingduwai na ka bynta ka jingjahthait jong u Pope.
Ki nongialam ka seng kila pynkynmaw ia ka jingnoh synniang jong u Pope ha kaban pynkup bor ia ki longkmie, ka jinglong kaba sngewrit bad kaba sngewsynei ia baroh ki briew bad ka khubor ka jongu kaba ula pynsaphriang shaphang ka jingai ia ka hok ha ka pyrthei baroh kawei.
Hadien kane, ka kynhun jong kane ka seng hapoh ka jingialam u Bah A.L. Hek bad u Rikman G Momin bad kiwei kiwei ki nongialam kila leit iakynduh ia u Archbishop ka Shillong Archdiocese, Most Reverend Victor Lyngdoh ha Shillong hynne ka sngi, ban pynpaw ia ka jingsngewlem bad ban don ryngkat lang bad ki riewngeit Catholic ka jylla Meghalaya bad ka Balang kaba don ha ka pyrthei baroh kawei halor ka jingkhlad noh jong u Pope Francis.
