Shillong, Iaiong 23: Ka Balang Catholic kala pynbna ba kan pynlong ia ka ‘Requiem Mass’ ha Cathedral Church, Laitumkhrah ha ka sngi ba pynlong ia ka jingon tep ia u Pope Francis, ha ka sngi Saitjain.
Haba iakren bad ki nongthoh khubor, u Bah Bedarius Shylla jong ka Media and Publicity Commission ka Shillong Archdiocese ula ong, “Ha ka Archdiocese ka Shillong, kan don ka Requiem Mass ha ka 23, 24 bad 25 tarik u Iaiong ha ka Cathedral Church, Laitumkhrah ha ka por 5:30 janmiet bad ha baroh ki Parish jongka Archdiocese ha ka por kaba la pynbeit hi da ki Parish bapher bapher”.
“Ha ka sngi ba tep ia u Pope Francis, kata ha ka 26 tarik u Iaiong kan don ka Requiem Mass ha Cathedral Church, Laitumkhrah ha ka por 10 baje mynstep bad ha baroh ki Parish jongka Archdiocese ha ka por 10 baje mynstep. Ki riewngeit ki lah ban iashimbynta ha ka jingleh Mass ia ka jingon tep ia u Pope Francis kaban sdang ha ka por 1:30 mynsngi (por ka ri India) lyngba ka Online Media” ula pyntip.
Katkum ka jingpynbna jongu Cardinal Kevin Joseph Farrell, ha ka 21 tarik u Iaiong ha ka por 9:47 mynstep (por Vatican), u Pope Francis ula khlad noh ha ka por 7:35 mynstep (por Vatican) bad ka por ha ri India ka long 11:05 mynstep, ha ka jaka sah ha Domus Sanctae Marthae, Vatican City kaba dei ka Easter Monday. La pynbna ba ka jingkhlad noh jong u Pope kadei namar ka Stroke, Coma bad ka jingbym lah treikam shuh jong u klongsnam.
Ia ka jingkhmih bniah bad ia ka jingpynthikna ia ka jingkhlad noh jong u Pope Francis la leh da u Cardinal Kevin Joseph Farrell, u Camerlengo jong ka Holy Roman Church.
Ula ong ia katei ha ka sngi Balang, ha ka por 9 baje mynstep katkum ka por jong ka Vatican kaba long 12:30 mynsngi ha ri India, hadien ka jingdep buh jingduwai shipor, kaba la pyniaid da u Cardinal Kevin Joseph Farrell, ia ka synduk metiap kaba don u Pope Francis yn rah na ka Chapel jongka Domus Sanctae Marthae sha Papal Basilica ka Saint Peter, katkum ki kyndon jong ka Ordo Exsequiarum Romani Pontificis (nos. 41-65).
Ha ka pulpit jong ka Confessio, u Cardinal Camerlengo yn pyniaid ia ka ‘Liturgy of the Word’ bad ha kaba kut kan don ka jingsdang pat ban peit ia ka met kaba la khlad noh jong u Pope.
Ha ka sngi Saitjain ha ka por 10 baje mynstep, ka sngi kaba nyngkong jong ka Novendiali (ki 9 sngi jong ka jingsngewsih bad jingbuh jingduwai la pynlong hadien ka jingkhlad noh jong u Pope), ha ka Saint Peter’s Basilica, ia ka Mass Ontep ia u Pope Francis yn pynlong katkum ki kyndon jongka Ordo Exsequiarum Romani Pontificis (nos. 82-109).
Ia kane ka jingon tep yn pyniaid da u Cardinal Giovanni Battista Re, Dean jongka College of Cardinals.
