Rung Final u Mark Ryan Syiem ha ka WAVES 2025

SHILLONG, Iaiong 22: U Mark Ryan Syiemlieh na ka jylla Meghalaya ula don ha World Audio Visual & Entertainment Summit (WAVES) 2025,ka thup Top 10 bad ioh rung ha ka Final jongka ‘Resonate: The EDM Challenge’, World Audio Visual & Entertainment Summit (WAVES) 2025 kaban long ha Mumbai.

Ka Resonate: The EDM Challenge’, ka jingiakob tem hapoh jong ka ‘Create in India’ Challenge kaban lam sha ka World Audio Visual & Entertainment Summit (WAVES) 2025, da kaba wanrah lang ia ki riewdonsap na kylleng ka pyrthei ha ka Electronic Dance Music (EDM) ban rakhe ia ka jingynwandur kaba long thymmai, ka jingtbit bad ka jingiatreilang ha ka jingpynmih ia ki sur jingtem bad ka jingtem ha khmat jong ki paidbah.

Ka Ministry of Information & Broadcasting (I&B) ryngkat ka jingiatreilang bad ka Indian Music Industry (IMI) kala jied bad pynbna ia ka kyrteng jong ki 10 ngut ki nongiashimbynta sha ka ‘Resonate: The EDM Challenge’ ha ka 12 tarik u Iaiong 2025.

U Mark Ryan Syiemlieh 22 snem ka rta na Lummawbah, Upper Shillong, Meghalaya ula don ha katei ka thup Top 10 jongka ‘Resonate: The EDM Challenge’. Kine ki 10 ngut kiba la ioh rung sha ka Final, mynta kin pynkhreh ban pyni ia ka sap ka phong ka jongki ha ka rukom tem ha ka rynsan jong ka WAVES kaban long ha Mumbai naduh ka 1-4 tarik u Jymmang 2025.

U Mark ula pyndep ia ka jingpule ia ka B.A Political Science na St. Anthony’s College, Shillong bad ia mynta u don ha Mumbai. Ka jingiaid lynti ka jongu ha ka kam tem jingtem kala ai mynsiem ia u lyngba ka jingsngewtynnad ban leh DJ bad ban pynmih ia ki sur jingrwai ki bapher.

Ula pynpaw iaka jingsngewkmen ban iashimbynta ha ka WAVE Summit bad ula ong, “Nga kwah ban ong, khublei shbun ia ki nongpyniaid jong ka World Audio Visual and Entertainment Summit, kaba la pynlong da ka Ministry of Information and Broadcasting, halor ka jingjied ia nga kum uwei na ki Top Ten ha ka Final jong ka Resonate EDM challenge. Ban long uwei napdeng jong ki Top 10 ha ka final ka long shisha ka burom. Nga lah aiti ha ka jingiaid lynti ka jong nga kum u nongtem, kane ka lad bad ka jingioh jingithuh ka long kaba kongsan bha ia nga bad kan pynkhlain ia ka jingngeit skhem ka jong nga ha ka tem ka put kaba nga lah thaw bad kala ai mysniem ban iai bteng ban pynlong uba shemphang ialade”.

Ula ong shuh shuh, “WAVES kala long ka rynsan kaba biang tam. Ka long kaba eh ban shem ia ki jingiakob kiba paka kiban kyrshan bad ai mynsiem ia ka jingdon sap bad nga dap da ka jingsngewnguh ia ka jingiohlad ban pyni ia ka sap kaba kala ai ha nga. Nga sngewnguh shi katdei ia kane ka kabu bad ngan iaid shakhmat nangne”.

Hadien ka jingkhmih bniah ia ka jingwan iashimbynta da ki spah ngut kiba donsap, ki 10 ngut kiba la shah jied ban pyni ia ka sap ka jongki ha ka Grand Finale jong ka WAVES ki kynthup ia u Srikanth Vemula, Mumbai, Maharashtra, u Mayank Harish Vidhani, Mumbai, Maharashtra, u Kshitij Nagesh Khodwe, Pune, Maharashtra, u Aaditya Dilbaghi, Mumbai, Maharashtra, u Aditya Upadhyaya, Kumarikata, Assam, u Devansh Rastogi, New Delhi, Sumit Biltu Chakraborty, Mumbai, Maharashtra, u Mark Ryan Syiemlieh, Mumbai, Maharashtra, Dibyajit Ray, Bongaigaon, Assam bad u Nobajyoty Boruah, Mumbai, Maharashtra.

Kine ki 10 ngut kiba la ioh rung sha ka final kidei kiba la mihkhmat na kylleng ki bynta jong ka ri India ha ka liang ka tem ban pynmih ia ki sur jingsawa kiba kyrpang kaban pynshongshit ruh ha kaban shad.

Kane ka jingiakob ka thmu ban sei bad ban kyntiew ia ka sap ha ka electronic music production bad DJing. Ka jingjop jong kane ka jingiakob kan pynkhlain ruh ia ka ri India ha ka kyrdan ha ka pyrthei ha kaba iadei bad ka music fusion, electronic music bad DJing.