Shen yn shim rai ka Sorkar ban kyntiew kyrdan ia ki skul Secondary sha ki Higher Secondary

Ban ioh klas lut baroh ki samla kiba pass ia ka eksam SSLC

Shillong Iaiong 21: Ka Sorkar Jylla shen kan sa shim rai ban kyntiew kyrdan ia ki Secondary Schools sha ka Higher Secondary Schools, ban wanrah ia ki lain pule (Stream) kiba thymmai bad ia ki por thymmai ban sdang ia ki jingshim klas hadien ba la ioh pdiang ia ki jingtyrwa na ki District School Education Officers (DSEO), ia kiba la bthah ba ki dei ban ai ia ki phom thep klas ne Admission Form sha baroh ki khynnah pule kiba la pass ia ka eksamin SSLC mynta u snem.

Ia kane la pyntip da u Director of School Education Literacy u Bah Banteilang J Kharshandi hynne ka sngi, hadien ba la wai ka jingialang kaba la lum da u Commissioner & Secretary u Vijay Kumar Mantri bad ki DSEO bad ki SDSEO na ka bynta ka jinpynrung klas ne admission ha ka Klas XI.

U Bah Kharshandi ula ong, ha kaba iadei bad ka jingkyntiew kyrdan ia ki 4 tylli ki Government Secondary School sha ka Higher Secondary School, ia kane yn sa shimkhia da ka sorkar.

Ula bynrap ba ha kaba iadei bad ka jingpdiang ia ki khynnah pule, ka tnad kala dep bthah ia baroh ki DSEO ba kin ai ia ki ‘Admission Form’ na ka bynta ki lain pule bapher bapher (Streams) na ka bynta ki jaka pule kiba kwah ban kyntiew noh sha ka Higher Secondary.

“Kan shong eh ha ka jingthrang jong ki khynnah pule, ka DSEO kan sa shim ia ka rai la ka jingthmu ban wanrah ia ka lain pule kaba thymmai ha ki jaka pule kiba lah don lypa ka long kaba donkam ne bym donkam. Kumta, hapoh lashai ka sngi baroh ki jingtyrwa yn sa pynthikna da ki DSEO hashwa ba kan shimkhia bad ka kynhun myntri ka jylla” la ong u Bah Kharshandi bad ka ong, “Hapoh lashai ka sngi haba baroh ki jingtyrwa ban sdang ia ki lain pule kiba thymmai bad ban sdang thymmai ia ka por jong ki jingpule. Lah dep ban ioh pdiang da ki DSEO, kumta ka sorkar kan sa shim ia ka rai lano ban khang noh ia ka jingshim ia ka admission bad ban sdang ne buh noh ia ka tarik ban sdang noh ia ka jingpule jong kane ka samoi pule kaba mynta”.

U Director ula pyntip ruh ba ka tnad kan sa thung ia ki nonghikai kaban long katkum ka jingpeit bniah kaba la leh da ki DSEO. Hynrei ula pyntip pat ba lada don tang 8-10 ngut ki khynnah pule, kan ym long kaba iahap ia ka sorkar ban plie ne sdang ia ka lain pule kaba thymmai bad ban thung ia ki nonghikai.

“Kumta kan shong ha ka jingbun jong ki khynnah pule da kaba ai nuksa, lada ngi ioh kumba 30-40 ngut ki khynnah pule, kumta ban plie ia ka lain pule ha ka Science ha kano kano ka Government Higher Secondary School kumta ia katei ka jingtyrwa yn sa phah ban leh ia kaba donkam bad ngin pan ia ka jingmynjur naka kynhun myntri bad hadien ba la ioh ia ka jingmynjur na ka kynhun myntri, ngin sa iaid shakhmat ban ai ia ki jingbthah sha baroh ki DSEO ba kin iaid shakhmat ban shim ia ka admission, ban iaid shakhmat bad ka jingpule jong kane ka samoi pule bad ia mynta hi katba ym pat thung pura ia ki nonghikai lah ban thung shwa shipor ia ki nonghikai” ula ong.

U Director ula ong, ba kakum ki jingtip kiba la don mynta bad haba khein lang ia ka jingdon ki jaka pule kiba la pyniaid da ki riewshimet, ka jingdon jong ki jaka pule kala long kaba biang ban pdiang ia baroh ki khynnah pule, kynthup wat ia ka jingpynbna ia ka resol jong ka CBSE bad ICSE.