Shillong, Iaiong 19 : Hapdeng ki jingsngewkhia bad jingpyrshah kiba jur ban wanrah ia ka lynti rel ha Meghalaya, ka Sorkar Jylla kala pynshai ba kane ka kam ka dei kaba la iasngewthuh bakla da ki paidbah haba pynthikna ba ka Sorkar kan burom ia ka mon u paidbah haba khmih ia ka roi ka par ba donkam ka Jylla.
U Symbud Myntri Rangbah Bah Prestone Tynsong hynne ka sngi Saitjain, ula ban jur ba ka jingwanrah lynti rel ha Meghalaya kam mut sayia ban shu plie rynghang ia ka jingwan rung kyrthep ki briew ba nabar bad ban wan buhai shnong-ka jingsheptieng kaba la slem bha da ki kynhun Sengbhalang bad ki katto katne ki nongshongshnong.
“Haba ngi iakren halor ka lynti rel, mano bym kwah? Ngi donkam ia ka rel. Bad da ka jingwan jong ka rel, kam mut ba ngin plie rynghang ia ka jingkhang ban wan rung ki briew ba nabar sha Jylla ba kin wan sah ne buhai shnong namar lada dei b aka long kumta, wat ma nga ruh ngan pyrshah ia ka rel” ong u Bah Prestone.
Ula kubur ia ka jyrwit jyrwat kiba don halor kane ka kam bad ong ba bun ki jingsngewkhia ki paidbah ka dei namar ka jingpur ki jingpynman ba bakla.
“Kam dei satia kumta. Ia kane la kam la ia batai ne pynman bakla. Ta ka daw ngi donkam ban iashong bad iakren sani bha hashuwa ban shim ia kano kano ka rai” ula ong haba khot sha ka jingiakren ia baroh ki kynhun bapher bapher.
U Bah Prestone ula pynthikna ruh ia ka nongrim jong ka Sorkar ba kan burom ia ka mon jong u paidbah. “Ngi ju ieng beit halor kaei kaba mon u paidbah. Ha kane ka kam ruh, ngin ym shim rai jubor ia kane ka kam” ula kular.
Lah ban kdew hangne, ka jingpyrshah ban wanrah lynti rel sha Meghalaya da ki kynhun Sengbhalang ka dei eh namar ba ka Jylla kam pat don satia ia ki ain ki ban tehlakam ia ka jingwan rung kythep ki briew ba nabar sha Jylla-kaba lah ban pynkylla rit paid ia ki trai ri trai mukul.
