Shillong, Iaiong 16 : U MLA ka Rajabala Dr Mizanur Rahman Kazi ula phah ia ka dorkhas sha u Myntri Rangbah ka Jylla Conrad K Sangma ba kyrpad ban kiar na ka jingpyntreikam ia ka Waqf (Amendment) Act 2025 ha Jylla Meghalaya.
Haba kren sha ki nongthoh khubor, u Dr Kazi ula ong “Nga dang shu aiti ia ka dorkhas hynne ka sngi bad la dep phah email ruh sha u hynnin ka sngi. Kine ki dei halor ka Waqf (Amendment) Act, 2025. Haba shimkhia ia ki jingsngew jong ki ritpaid ha Meghalaya bad ha Ri India, nga la kyrpad ia u CM ka Meghalaya ban sngewbha kiar na ka jingpyntreikam ia ka Act hapoh ka Jylla”.
Namar ba u Myntri Rangbah u dang leit jingleit shabar ka Jylla, u Dr Kazi ula pynthikna ba ia ka copy jong kane ka dorkhas la aiti sha ka Ophis u CM katba ia ka email la phah ruh sha u ban pynthikna ba un ioh pdiang ia ka khubor.
“Kane ka ain ka la dei lypa kaba kynrum kynram bad ka dang don hapdeng ka jingkhmih ka Iingkashari Supreme Court. Ka mushlia ia ka jinglong laitluid jong kawei ka niam bad wanrah ia ki kyndon kiba wanrah ia ka jingbym sngew shngain bad ka jingbym shongsuk hapdeng ki ritpaiad hapoh ka Ri” ula ong.
Haba kylli halor ki jingkhmih lynti jong u na u Myntri Rangbah ka Jylla, une u MLA ula pynpaw ia ka jingsngewskhem bad ong “Khlem pep, hooid. U Myntri Rangbah u dei u nongialam jong uba bun balang bad uba ju synshar ia ka Jylla da ka jingbym noh liang bad jinglong kumjuh ia baroh ki jaidbynriew. Nga don ia ka jingkyrmen kaba skhem ba un mynjur ia kane ka jingkyrpad jong ngi bad leh ia kaba donkam”.
Ula ban jur ia ka jingshongsuk shongsain ki jaidbynriew bapher bapher ha Meghalaya bad ong “Baroh ki Jaidbynriew, kynthup ki Muslim kila im suk bha ha Meghalaya. Kam pat ju don kano kano ka jingia kynad jaidbynriew kaba heh. Hynrei, ki jaidbynriew ritpaid ki khuslai shisha halor ka jingtuklar ka Sorkar ia ka jinglong laitluid ka niam. Na ka bynta ka jingsuk bad ka jingshngain, nga ngeit ba u CM un shim ia ka lynti kaba dei” ong u Dr Kazi.
Une u MLA ula bynrap “Hooid kala don ka jingbym sngewsuk hapdeng ki briew, hynrei baroh ki ia sngewthuh bha ban pynbeit ia kane ka kam da ka jingsuk. Hapoh ka jingialam u Myntri Rangbah ba don burom jong ngi, nga ngeit skhem ba un sa pynbeit ia kane ka kam ha ka lynti kaban pynthikna ba baroh ha Meghalaya kin sngew shngain bad ioh jingiada”.
 Act 2025 ha Jylla Meghalaya.){kind=link}