Silchar, Iaiong 16: Shi sngi hadien ba u Myntri Rangbah ka jylla Assam u Himanta Biswa Sarma u la kren shai ban khang pyrshah ia kiba ïakhih halor ka Waqt Act, ki pulit ka Assam kila kem ia hynniew ngut ki briew kiba ialeh pyrshah ia ka jingkhang jong ka sorkar.
Ka jingkem ki pulit Assam ia hynniew ngut ki samla kadei ba ki donkti ban kawang maw ia ki pulit kiba pahara ha ka por ba don ka rally ban pyrshah ia ka Waqt ha Silchar kaba hap hapoh Cachar District jong ka Assam.
Katkum ka tyllong khubor na ki pulit kila iathuh ba hynnin ka miet kala don ka jingkhynra ha thain Bagadahar bad ha Kashipur kaba hap hapoh Silchar Police Station bad ioh ban kem ia 7 ngut kiba la shah kynnoh ba ki donkti ha katei ka jingjia bad ia kine la rah noh sha judicial custody.
Ha ka 13 tarik mynta u bnai kila don kumba 300 ngut ki briew kiba la ialum paidbah ha ka shnong Berenga kaba hap ha Silchar Police Station bad kila sdang ban iaid paidbah sha ka sor Silchar ban pyrshah ia ka Waqt Act.
Ka kynhun ki pulit na Silchar kila poi ha katei ka jaka ban pynsangeh ia ki paidbah ba kin bteng ban iaid shaphrang bad ha kane ka jingjia kala poi sha u pud ba ki pulit kin pyndonkam da u lathi ban pynpra ia ki paidbah.
Halor kane ka jingjia la register case pyrshah ha Silchar Police station hapoh ki kyndon no. 401/25 U/S 191(2)/191(3)/190/223/125/132/121(2)/121(1) BNS R/W Sec 3 of PDPP Act.
