Nongpoh, Ïaïong 11: Uwei u briew ula iap bad arngut kila mynsaw jur haba ka kali ba ki iashong, kala kylla baji hapoh ka surok NH-6 ha ka thain Shangbangla, Ri-Bhoi District.
Kane ka kali ba kylla ka dei ka Tata Ace kaba don u nombor AS25-EC-2365 bad kaba dang kiew na Jorobat sha Nongpoh. Kane ka jingjia kala jia ha ka por 4:30 baje eiei.
Ia kane ka kali la niah da u Md Maqbool Alam uba dei na Korkagaon, Bihar. Une u nongniah la kynnoh ba ula pynher sted ia ka kali haduh ba um lah tehlakam bad poi leit tynrah ia u divider, kaba lam sha ka jingkylla baji.
Ha kane ka jingjia, une u nongniah bad arngut ki briew kila mynsaw kiba la tip kyrteng da u Md Arif (29) na Borkagaon bad u MD Ezaj Ansari (26) na ka Bishnapur Keshar, Muzaffarpur. Ia kine kiba mynsaw la pynkit noh mar mar sha Nongpoh Civil Hospital hynrei u Md Arif ula khlad noh namar ka jingmynsaw kaba kham jur.
Ki Pulit kila register case halor kane ka jingjia bad ka jingtohkit mynta kala iaid shakhmat.
