Shillong, Iaiong 09: Ka Myntri Sorkar kaba dei ruh ka MLA jong ka East Shillong constituency Kong Ampareen Lyngdoh hynne ka sngi Balang, ka la hiar jurip hapoh ka thain Lachumiere bad bthah ia ka tnat Urban Affairs ba kan peit bniah ia ka jingeh jong ka jingbym biang ki nala um ha ka thain, kaba lam sha ka jingshlei um ha ka por ba jur slap.
La synran ia ka Myntri Sorkar da ki dkhot ka Dorbar Shnong Lachumiere bad ki ophisar naki tnat treikam Sorkar.
Haba kren sha ki lad pathai khubor ka Kong Ampareen kala ong “Nga la iakren ïa kane ka kam bad ki ophisar ka tnat Urban Affairs kiba don lang ha ka jingleit jurip, ngi donkam ban leh kyrkieh ïa kane ka kam. Ngan sa bishar bniah biang ïa kane ka kam hadien 20 sngi”.
Ka Kong Ampareen kala ong ba ka jingpyndep ia ka surok All-Saints’ Road kaba don shadien jong ka All-Saints School bad ka jingpyniaid ia ka nala ka long ka ba donkam kyrkieh ban pyndep lada jia ba jur slap.
“Mynta ka sngi ngi la ïoh ïa u slap ba nyngkong eh hashuwa ban wan ka aiom slap kaba jur. Ka nala shadien jong ka Sylvan House shi bynta jong ka Secretariat Hills baroh kawei kan shlei um lada jur u slap bad kan kylla long ka jingeh kaba khraw iaki longïing ha shi lynter jong kane ka thaiñ. Ngi donkam ban wad ki lad lynti ban iada iaki nongshong shnong” kala ong.
Ka Myntri kala pyntip ba ka um lyngba ka nala kaba don shadien jong ka Sylvan House ka iaid shilynter na Secretariat Hill sha ka Wah Pomdngiem bad ïa kane ka nala donkam ban pynjylliew bad pyniar ban lait naka jingshlei um.
“Ngi donkam ban pynthikna ba ka Urban Affairs kan shimkhia mardor ïa kane ka jingeh namar ka jingshlei um ka lah ban long kaba ma bha bad baroh ki nongshong shnong kiba sah ha kane ka bynta jong ka Sylvan House kynthup ïa ka Lachumiere pdeng” kala ong.
Nalor kane ka Myntri kala shong bishar bniah ïa ka rukom pynïaid kali hapoh ka thaiñ Lachumiere.
“Namar ba ka jaka ka dei kaba bun tam ki ophis Sorkar ki nongshong shnong mynta ki shem jingeh bha ban leit jingleit man ka sngi namar ka jingdheng kali ka jur bha hapoh kane ka thaiñ. Nag la ioh jingtip ba ka tnat Urban Affairs ka don ka Master Plan kaba ki dang pynkhreh bad shen kin shim ban pynduna ïa ka jingdheng kali” kala ong.
“Hooid, ka jingangnud ba kongsan tam ka long ban pynkynriah noh ïa baroh ki ophis Sorkar sha New Shillong Town. Nga kyrmen baka Sorkar kan shimkhia ïa kane ka jingeh bad nga kyrmen ba shen ngin sa ïoh ïa ki lad ki lynti ban pyllait naka jingdheng kali” ka la bynrap.
