Shillong, Iaiong 09 : Ka Myntri bad nongaiktien ka Sorkar Kong Ampareen Lyngdoh ha ka sngi Balang kala kynthoh ba ka kam ba iadei bad ka jingpynrung kyrteng bad pyniasoh ia u Aadhaar ka dei ka kam kaba iaid palat ia ka bor jong ka Sorkar Meghalaya.
Kat kum ka jingong jong ka, ka long kaba bakla shikatdei eh ban kynnoh ia ka Sorkar Jylla halor ka jingpyniasoh ia u Aadhaar bad kiwei ki skhim ne jingmyntoi bala ai da ka Sorkar Pdeng sha ki paidbah nongshongshnong.
Haba kynthoh ia ka jingiakhih jong ka Awaken India Movement (AIM) pyrshah ia ka jingpyniasoh Aadhaar, ka Myntri kala ong “La batai ia nga da ka Deputy Commissioner ba ki don ki Seng kiba la mih ban iakhih pyrshah ia ka jingpyniasoh Aadhaar sha ki skhim bapher bapher ba ai sha ki paidbah”.
Haba pynshai ia kane ka kam, ka Myntri kala ong “Nyngkong eh, ka bakla palat ban tynrong ia kane ka jingeh sha ka Sorkar MDA-I lane MDA-2 lane kino kino ki seng sain pyrthei. U Aadhaar u dei uba mih da ka Bill jong ka Parliament bad pynlong ain da ka Parliament bad ka jingpyniasoh ia u Aadhaar ka dei ka kam ba palat ia ka bor jong ka Sorkar Meghalaya”.
Ka pynkynmaw ba ha u 2016-17, ka Sorkar Meghalaya kala thoh shithi sha ka Sorkar India ba kyrpad ban pyllait noh ia ka Meghalaya na ka jingtreikam u Aadhaar hynrei “Ka Sorkar Pdeng kala sngap beit jar jar ia kane bad dei hadien bala ioh jingtip ia ka jinghap pyniasoh ia u Aadhaar sha ki skhim paidbah kum ka ration card, job card, bad mynta wat ia ka MHIS bad kiwei kiwei kiba syriem kum kine ki skhim”
Haba kynthoh ba ka jingong ba kane ka dei ba kam jong ka Sorkar MDA ka dei kaba bakla, ka Myntri kala ong “Lada phi peit ia kane ka jingpyniasoh Aadhaar, ki nongshongshnong ki long laitluid ban nym shim ia kino kino ki skhim lada ki kwah hynrei lada phi kwah ban ioh ration card, MHIS card phin hap ban don ia u Aadhaar. Lada phi dei ki samla pule ba aplai ia ka scholarship phi hap ban don ia u Aadhaar. Kumta ka Sorkar India kala pyndonkam ia u Aadhaar kum ka jing pynrung kyrteng, ka syrnot ka ban ai ban ithuh kum ki nongshongshnong ba dei hok ka Ri”.
