Nongstoiñ, Ïaïong 06: Ka jingpynsahteng jong ki ar tylli ki sorkar jylla ban pynbeit noh ïa u pud u sam ka Langpih sector, ki nongsynshar shnong ka thaiñ kila rai ban pynlong da ka jingïalang paitbah ha ha ka 9 tarik mynta u bnai.
Ia kane ka jingialang paidbah yn pynlong ha ka por shiphew baje mynstep ha Langpih, ha phyllaw jong ka Raidmynsaw Upper & Secondary school.
U bah Hindro Samakha Chairman ka Raidmynsaw bad dkhot ka Regional Committee on Border Dispute kaba peit ïa ka West Khasi Hills, u la ong ba ka jingpynlong ïa katei ka jingïalang ka dei halor ka jingpynslem jong ka sorkar Meghalaya bad Assam, ban pynbeit ïa katei ka jingeh kaba la neh la palat sanphew snem mynta.
U la iathuh ba ki paidbah kila khmih lynti bha ban dep pynbeit noh ia ka jingiakajia pud ha ka thain khamtam hadien ka jing wan iuhkjat hi da lade ki arngut ki Myntri Rangbah ka Assam bad Meghalaya-Himata Biswa Sarma bad Conrad Kongal Sangma ha ka 16 tarik Naiwieng 2023.
U la ong ruh ba ka jingpynsahteng ban pynbeit ïa u pud u sam, ka wanrah shibun ki jingeh ïa ki paitbah bad ka pyn pisa ïa ka jingmut jingpyrkhat jong ki namar haduh mynta ki dang don ha ka jingbym sngew shngaiñ ha ka jingim ka jong ki.
U bah Samakha u la ong ruh ba ka jingpynsahteng ka pynlong ruh ïa ki pulit Assam kiba don ha Langpih, ba kin shim kabu ban khñiot bein ïa ki paitbah, da kaba kem ïa ki kali kiba kit ïa ki mar rep mar riang kum u sying, synsar bad kiwei kiwei bad khrong pisa beaiñ na ki.
Ha kajuh ka por, u bah Sakhama ula ong ba ka huri hura ka la sdang ban mih pyrthei biang ha ka thain kumba la jia ha kine ki taïew ba la dep da ka jingshah kem ki nongshong shnong kiba dei ki Khasi ha ki pulit Assam bad shah pynshitom khlem nongrim.
Ula ong ba lada ka sorkar ka dang pynslem ban pynbeit ïa u pud u sam, khlem artatien ka jingïakynad kan sdang biang ban kan buh ha ka jingeh kaba khraw ïa ki paitbah.
U la ong ruh ba ha ka 9 tarik la kyrpad ïa baroh ki nongsynshar shnong bad ki paidbah ba kin shimkhia ban ïapoi. U la ong ruh ba ha kane ka por ka jingïalong kawei bad ka jingïatylli ka donkam haduh katta katta.
U la kyntu ïa baroh ba kin ïa klet noh shuwa ïa ki kam hapoh ïing, namar kane ka por ka dei ka por ba ki hap ban ïakhun tyngeh ïa kiba nabar jong ka jylla. Lada kim ïatylli kiba nabar kin nang ïoh bor ban knieh ïa ki jaka ki puta bad ka khyndew ka shyiap.
