Shillong, Iaiong 04: U Myntri Sorkar Jylla u Bah Paul Lyngdoh ha ka sngi Thohdieng ula ong, ba ka jingthaw iaka All Party Committee kan plie lad ïa baroh kiba kyrshan bad kiba pyrshah lynti Rel ban ïaphylliew jingmut ha shuwa ba ka Sorkar Jylla kan shim iaka rai ba khatduh.
Haba kren sha ki lad pathai khubor u Bah Paul Lyngdoh ula ong, ba ha kane ka All Party Committee yn don lang ki kynhun ki MLA bad MDC, ki Sengbhalang, ki Nongkitkam Shnong bad kiwei kiwei ki kynhun, nalor ki sengsain pyrthei jong ka Meghalaya.
“Ha kane ka Committee ban khmih hi da u Myntri Rangbah ka Jylla ngi kwah ban pynrung ia baroh ki kynhun, kito kiba pyrshah ia ka Rel, kito kiba kyrshan iaka Rel bad kito kiba long pdeng ia ka jingmut jong ka Rel khnang ban iathir sani bha halor kane ka project kaba long kaba donkam bha ban kyntiew iaka ioh ka kot” la ong u Bah Paul.
U Bah Paul ula ong ba ka jingmut jong ka Committee baroh kawei hangne ka long ban ailad lane ban plie lad ban ai iaka rynsan ban pynpaw ia ki jingmut kiba pher bad teng teng kiba iapher ruh halor ka Project lynti Rel.
Haba kylli u Bah Paul u la ong “Em iaka mynta ha kane ka Committee ngin nym pat kynthup iaka Northeast Frontier Railway (NFR) namar ngi kwah ban iamir jingmut shwa tang ki kynhun napoh Meghalaya hynrei hadien bala pyndep lut iaki kam, ngin sa iawer ruh iaki shnat treikam ka Sorkar Pdeng”.
