Imphal, Iaiong 3: Ka party Congress hapoh ka jylla Manipur kala pynpaw ka jingpyrshah jur halor ka jingthmu ban phiah thymmai ia ki constituency (Delimitation) hapoh ka jylla da kaba pynshong nongrim katkum ka khana samari jong u snem 2001.
Ka party Congress kaba don hapoh ka liang pyrshah hapoh ka iing dorbar thaw ain, kala dawa ban pynbeit bha ia ka khana samari bala lum hashuwa ban pynbeit ne phiah thymmai ia ki constituency.
Haba kren sha ki lad pathai khubor, u Vice President u Hareshwar Goswami u la ong, “Ka mat halor ka jingbym beit ka khana samari u snem 2001 ka la mih hadien ba la lap ia ka jingkharoi bym iahap shuh jong ki briew ha ki khyndai tylli ki subdivision kiba hap ha ki lai tylli ki district ha ka jylla,”.
Shuh shuh u Goswami u la ong, “La lap ba ka jingroi ki briew ka long palat ia ka 100 na ka 100 ha ki katto katne ki subdivision jong ka jylla”.
“Ka seng ka kyrshan ia ka jingphiah thymmai ia ki constituency, hynrei ka dei ban long katkum ka jingkhein kaba dei halor ka jingdon ki briew khlem kano kano ka jingbakla bad baroh ki tip ba ka jingkhein u snem 2001 ki don shibun ki jingbym iahap,” u la ong.
“Kiba bun ki briew, ba kynthup naduh ki seng sain hima sima, ki seng trei mon sngewbha bad kumjuh ruh ki seng bhalang kim pyrshah ia kane ka jingthmu ban phiah constituency hynrei kila dawa ba dei ban leh katkum ka khana samari kaba dei,” ong u Goswami.
Ha ka 25 tarik u bnai Lber, ki nongialam jong ki 16 tylli ki seng sain hima sima ha Manipur ki la pynlong ia ka jingialang bad ki la kyntu ia ka sorkar pdeng ban pynjlan ia ka jingphiah thymmai ia ki constituency haduh u snem 2026.
 hapoh ka jylla da kaba pynshong nongrim katkum ka khana samari jong u snem 2001.){kind=link}