Shillong, Iaiong 02 : U Nongialam ka BJP bad Myntri Sorkar Bah A.L.Hek ha ka sngi Balang ula ong ba kam don satia kano kano ka jingleh bakla ha kaban dawa ban pynkha ia ki Jylla kiba rit.
“Ki paid Garo ki kwah ia ka Garoland bad ki Khasi ki kwah ia ka Khasiland, kumta hangno don ka jing bakla ban pan ia ki Jylla kiba rit. Hato ka don ka jingleh bakla ban pan ia ki Jylla barit? Kam don jingeh haei haei ruh” ong u Bah Hek.
Une u Nongialam ka BJP ula kren ia kane haba jubab halor ka jingkren u (L) Purno Agitok Sangma ba iadei bad ki Jylla rit.
Hynrei une u Nongialam ka BJP ula kyntait ban kynthoh eiei halor ka jingiakynad hapdeng u Myntri Rangbah barim ka Manipur N Biren Singh bad u Myntri Rangbah ka Meghalaya Conrad K Sangma halor ka jinglong jingman ha Manipur.
U Biren Singh haba kynnoh ia u Myntri Rangbah ka Meghalaya Conrad K Sangma ba u wan tuklar ia ki kam pohiing ka Manipur, ula thoh ha social media ba ong “U (L) P.A Sangma shisien ka por uba ai ksai ban phiah ia ka NE sha ki Jylla ba rit ba rit halor ka jingdon ki Jaidbynriew, ka jingthmu kaba buh jingma ia ka jinglong kawei jong ka Ri. Myntam ngi la iohi ia kajuh ka jingpyrshang ban tuklar ia ki kam pohiing ka Manipur ban pyniapait iapra ia ka Jylla”.
“Ngam don eiei ban ong halor ka jingkynad hapdeng u A bad B. Nga don hangne tang na ka bynta ka bha ka miat u paidbah bad ka Jylla Meghalaya” ong u Bah Hek.
Haba kylli, u Bah Hek ula ong ba ka jingiakynad kam dei satia hapdeng ka BJP bad ka NPP.
“Kane kam dei hapdeng ka NPP bad BJP hynrei ngam don eiei ban ong halor kane ka jingiakynad hapdeng kine ki arngut ki briew” ula pynkut.
