Assam | Thalain u Himanta Biswa ia u Md Younis ba kynthoh shah kerkut ka thain NE

Guwahati, Iaiong 1: U Himanta Biswa Sarma uba dei u Myntri Rangbah ka Assam u la thalain bad pynrem jur ia u Md Younis ka Bangladesh, uba la kdew ia ki hynniew tylli ki jylla ka thain shatei lam mihngi ne (North East India) kum ki jaka ba shah kerkut na baroh sawdong (landlock) bad niew ïa ka Bangladesh kum ka “nongpeit ia ki ba kin ioh rung sha duriaw.”

“Kane ka jingkren ka pynpaw ïa ka jingmut halor ka jingbym shngain ka thain namar ka jingdon ia u ryndang syiar ba pyniasoh bad ka India” ong u Sarma haba bynrap ba kum kine ki jingmut ki dei kiba la pysngew la slem bah da ki nongshun ba hapoh ka India kiba la ai jingmut ban pyndkut noh ia kane ka lynti iaid ban pyniakhlad ia ka thain NE bad ka Ri India.

U Sarma u la ban jur ïa ka jingdonkam kyrkieh ban pyniasoh ïa ki lynti rel bad ki surok kiba kham khlaiñ hapoh ka thain bad ai jingmut ban wad ia kiwei kiwei ki lynti iaid kiba pynïasoh ïa ka thaiñ Shatei Lam Mihngi bad ka ri India baroh kawei haba iaid lyngba kane ka jaka kaba khim.

U Sarma u la ong, “Watla kane ka lah ban wanrah ïa ki jingeh kiba khraw ha ka liang ka jingstad ki engneeer, hynrei ka long kaba lah ban pynurlong da ka jingkut jingmut bad ka jingpynwandur thymmai. Kum kane ka jingkren pynkhihwin u Md Younis ym dei ban shim sting, namar ka pynpaw ïa ka jingpyrkhat ba kham jylliew bad ki jingthmu ba la slem bha”.
U Md Younis, ula pynpaw ruh ha ka jingkynthoh, ha ki rynsan social media, ha kaba ula pynshlur ia ka China, ba kan seng ia ka lad kamai kajih ha Bangladesh, da kaba kdew ia ka jingdon jong ka Dhaka, ha duriaw.

Ki hynniew tylli ki jylla ka ri India, kiba don ha ka thain shatei lam mihngi, ki dei kiba bym don lynti pyniasoh nangno hangno ruh ban poi shaka ri bad ngi long tang ma ngi ki nongpeitngor ia ka duriaw jong kane ka thain u la ong.

Ka seng Congress, ka ong ba katei ka jingkren u Younis, ka long kaba ma shibun, na ka bynta ka jingshngain jong ka thain shatei lam mihngi bad ka la kynnoh ruh ba ka sorkar India, ka la iehnoh bein ia katei ka thain, kaba kynthup ruh ia ka Manipur.

“Ka Bangladesh ka khot ia ka China ban ker kut ia ka India. Kane ka rukom leh ka sorkar Bangladesh ka long kaba ma shibun ia ka jingshngain jong ka thain shatei lam mihngi jong ngi”, la ong u heh ki media bad ka jingpynbna paidbah ka Congress lyngba u Pawan Khera, ha ka jingthoh halor ka X ha ka ktien Hindi.