Shillong, Lber 19 : U Myntri Rangbah ka jylla u Conrad K Sangma hynne ka sngi Balang, ula leit iakynduh ia u Myntri ka Sorkar Pdeng ka tnad Social Justice and Empowerment Dr Virendra Kumar bad kyrpad ban tei ia ka Sports Centre for Persons with Disabilities ha Meghalaya, ka ban pynlong ia ka National Games ha u snem 2027.
Ha ka shithi kaba la phah sha u Dr Kumar, u Conrad Sangma ula ong, “Nga kyrpad ia ka jingkyrkhu na phi ban bhah ia kane ka jaka ialehkai na ka bynta ki briew kiba don jingduna ha ki dkhot met jong ka jylla Meghalaya bad nga pyn thikna ha phi ia ka jingkyrshan bad ka jingiatreilang kaba pura na ka sorkar jylla ha kaban tei pyndep ia kane ka projek ialehkai kaba kongsan bha”.
U Myntri Rangbah ula ai khublei ia u Myntri ka Sorkar Pdeng ia ka jingshimkhia ban tei ia ki 5 tylli ki Centre for Disability Sports for persons with disabilities hapoh ka ri.
“Nga ngeit skhem ba kane ka sienjam kan iaid ha ka lynti kaba jngai ha kaban lap ia ka sap jong ki briew kiba don jingduna ha ka dkhot met shisien ba la don kane ka Centre.
Ka long ka khyllipmat kaba sngewsarong ia ngi ba kawei ka Disability Sports Complex kan don ha Shillong, Meghalaya. Kane ka centre kan ai jingmyntoi ia ka thain shatei lam mihngi bad ia ka Meghalaya ha kaba kum kane ka jaka ialehkai kadei kaba donkam thikna bha,” ong u Sangma.
Ula pyntip ba ka Meghalaya kan pynlong ia ka National Games ha u snem 2027, u Myntri Rangbah ula ong, “Kum ka Sports Centre for Persons with Disabilities kan long ka jingnoh synniang ia ka jingdonkam ia ki jingtei na ka bynta ka National Games.”
Ula ong ba ka sorkar kala dep iakren bad ka tnad Persons with Disabilities ia ka jaka kaba 40 Akar ha Mawkhanu, Mawpdang, New Shillong Township (NST) la dep ban mang na ka bynta katei ka Centre bad ia katei ka jaka lah ban pynthikna noh ban tei ia katei ka centre ha ryngkat ka jingiasyllok bad ka sorkar India.
“Ngi dap da ka jingsngew burom ban pdiang ia ki ophisar jongka sorkar pdeng ha ka 13 tarik u Rymphang 2025. Ka jingwan ka jongki kala nang pynskhem ia ka jingkular ia kane ka projek bad ngi thrang ban iatreilang bad ka Ministry ban pynurlong ia kane ka jingthmu” ula ong bad ka pynthikna “Ngi kular skhem halor kane ka projek ha ka kyrdan kaba heh tam bad ba ka sorkar jylla kan pynlut ha kaban pynmadan ia katei ka jaka bad ban pynbiang bha ia ka jaka bad ia kiwei kiwei ki jingdonkam na ka bynta ka Centre for Disability Sports.”
