Shillong, March 18: Ka Myntri ka koit ka khiah ka jylla ka Dr. M. Ampareen Lyngdoh kala pynpaw ia ka jingsngewsih halor ka jingkhlad noh jong ki arngut ki khynnah skul ka Meghalaya, na ka jingsuba ba kila ioh bih na ka bam hapoh ka hostel jong ka Residential School ha Malavalli, Karnataka.
Haba iakren bad ki nongthoh khubor, ka Kong Ampareen kala ong ba katei ka jingjia ka long kaba sngewsih kthang bad kala banjur ia ka jingskhem jingmut jong ka sorkar jylla ban pynioh ia ka jingbishar kaba hok bad ban phah pynshitom khnang ba kum kitei ki jingjia kin ym jia shuh ha pateng ban wan.
“Ka long kaba sngewsih ba ka jingim jong kitei ki arngut, kiba leit wad ia ka jingnang jingstad kin mad ia ka jingjia kaba sngewsih. Ka sorkar kala pynbor ia ka sorkar Karnataka ban ai ia ka jingbishar kaba hok, ban pynlong ia ka jingtohkit bad ban iai buddien. Ngi sngewsih bha bad ngin ym shongthait katba ngim pat lah ban shimkhia ia kane ka jingjia kaba sngewsih” la ong ka Kong Ampareen.
Ka Myntri kala kyntu ba dei ban long kiba peitngor bha bad ban ai ka jingpynsngewthuh ia ki kmie ki kpa haba ki phah ia ki khun sha ki jaka pule, ban pynpaw ia ka jingkongsan ban pynthikna shwa ia ka jinglong jingman jong ki jaka pule.
“Kane ka jingjia kala long kum ka jingpynpeit mat ia kaba donkam ban da khmih bniah shwa. Ngi dei ban pynthikna ban don ia ka jingbthah kaba kongsan, ban pynsngewthuh bha ia ka imlang sahlang bad ban nang bad sngewthuh na katei ka jingjia bad ban kiar ba kan ym jia shuh hadien habud” kala bynrap.
Kala pynpaw ia ka jingkyrmen ba ka tnad pule puthi kan wanrah ia ki kyndon treikam ban pynbha bad ruh ban don ka jingkitkhlieh ia ki jaka pule kiba pdiang ia ki khynnah pule kiba nabar ka jylla.
“Ngi dei ban maham ia ki kmie ki kpa ha ka por kaba dei ban pynthikna ba kum kitei ki jingjia kin ym jia shuh. Kane kadei ka jinghikai kaba ngi dei ban ioh bad ka jingpyrshang ka jong ngi kan pynleit jingmut ha kaban ialeh ban kiar na kum kitei ki jingjia ha ki por ban wan” kala ong.
Ka Sorkar Meghalaya kala pynbna ban ai jingiarap T.3 Lak sha ka longiing kaba la duh noh ia la u baieid bathoin bad la pynthikna ban pynlut ia ka bailut baisep baroh ia ki khynnah skul kiba don hapdeng ka jingsumar.
Ki heh ophisar ka jylla kiba kynthup ia u Inspector of Schools P. Sunn bad Sub-Divisional School Education Officer R. Kharsyntiew, la phah leit sha Karnataka ban iarap bad kyrshan ia ki longiing longsem bad ban iatreilang bad ki bor pyniaid district.
U Myntri Rangbah ka jylla u Conrad K. Sangma ula pynthikna ba kila don kiba shah kem halor katei ka jingjia bad katkum ki tyllong khubor kiba la iohlum la iathuh ba ki kynthup ia u trai jong katei ka Residential School bad u Warden jong ka Hostel.
