Shillong, Lber 12 : U Nongialam ka Liang Pyrshah Mukul Sangma ha ka sngi Ba-ar, ula dawa ban leh ia ka safety audit ia baroh ki sainar pyniaid bording khnang ban tehlakam ia ki jingjia shah lympat bording hapoh ka Jylla.
Haba pynpaw ia ka jingsngewkhia halor kane ka kam ha ka kynta kylli jingkylli, u Mukul ula dawa ia ka jingkular na ka Sorkar ban pynthikna ba kan don ka safety audit ia baroh ki sainar pyniaid bording. Kane kan pynthikna ia ka jingshngain ki trai jaka bad ki nongrep naba bun sien kine ki dei ki jaka ba ju jia bha ki jingshah lympat bording.
Haba jubab, u Myntri ka tnad Bording AT Mondal ula kular ban sa khmih ia kane ka kam haba pyntip ba la shimkhia ban leh ia ka safety audit ia baroh ki sainar pyniaid bording.
Shuwa kane haba jubab ia ka jingkylli ba wanrah da u MLA ka TMC Rupa Marak, u Myntri ula pyntip ba ki don saw tylli ki jingjia shah lympat bording kiba la pyntip hapoh ka Dadenggre Block ha kine ki 10 snem bala leit noh.
“Ia ki longiing jong ki lanot shah lympat bording la siew ia ka jingduhnong na ka jingduhnoh ia ki mynsiem kaba kot haduh T.30 lak” ula ong.
U Marak ula pyntip ruh hapoh ka Iing ba ka don kawei ka jingjia shah lympat bording ha ka constituency jong u ha kaba hadien 8 snem, la siew ia ka jingduhnong kaba long T.1 lak ha ka 3 tarik u Lber mynta u snem.
Halor kane, u Myntri ula ong “Hooid, ka dei ka jingshisha bad ngi la tohkit ia kane ka jingjia ba balei ka shimpor da ki snem bad nga kular ba kan ym jia shuh kumne nangne shakhmat”.
