Shillong, Lber 05 : U Myntri Rangbah ka Jylla Conrad K Sangma ha ka sngi Balang ula ong ba ka Sorkar Jylla kam pat ju ia kren halor ka mat jingtyrwa ban pyntreikam ia ki katto katne ki kyndon jong ka Article 371 ka Riti Synshar ka Ri ha Meghalaya.
Kat kum ka jingong jong u, ka long kaba donkam ban iakren bad iatai ia ki jingmyntoi bad jingduna jong ka Sixth Schedule bad ka Article 371 jong ka Riti Synshar ka Ri.
Haba jubab ia ka jingkylli bala wanrah da u MLA ka VPP na North Shillong Bah Adelbert Nongrum ha Iingdorbar, u Conrad ula ong “Ki don ki jingmyntoi bad jingduna jong ka Sixth Schedule bad ki don ki jingmyntoi bad jingduna jong ka Article 371. Lada phi peit sha ka Sixth Schedule, ki don ki kyndon ba lah ban don ia ka Lagislative Wing, Executive Wing bad Judiciary Wing katba ka Article 371 kam don satia ia kine ki kyndon…kumta, ka dei ka kam kaba hap ban iakren bad iatai”.
Haba pynpaw ba ka Article 371 kam long kumjuh ia baroh ki Jylla, u Myntri Rangbah ula ong “Ka Article 371 kam shym la kren eiei halor ka jingiada lane ban pyntreikam ia ki ain ka Sorkar Pdeng. Ka jingmut jong nga ka long ba ka Article 371 kam long kumjuh ia baroh. Ha ki Jylla bapher bapher ki don la ki jong ki Article 371 bad ki kyndon ba iapher. Kumta, lada phi kdew ia ki kyndon kiba don ha Nagaland, ka mut ba ia kane ka kam ngi hap ban iakren bad iatai”.
“Ka jingmut jong nga ka long ba ka dei ka kam kaba hap ban peit bniah na baroh ki liang. Phi don ia ki jaka Sixth Schedule kaba don ia ka Legislature Wing, Judiciary Wing bad Executive Wing ki bym don satia ha ka Article 371. Mynta kaei kaba ngi jied? Ngam lah ban tip la kane ka dei ka rynsan kaba dei ban iakren ia baroh kine kiei kiei namar ka dei kaba hap ban iatai” ula ong.
Nalor kane, u Myntri Rangbah ula pynpaw ruh ba kam mih satia ka jingkylli ban wanrah ia ka Uniform Civil Code (UCC) hapoh ka Jylla.
“Ngi la kren shai bha ba kam mih satia ka jingkylli ban wanrah ia ka UCC ha ka Jylla jong ngi lane ba ngin pyntrei ia kano kano ka kam ba iasyriem kum katei” ula ong.
