Shillong, Rymphang 28 : Ka Hynñiewtrep Border Dispute Redressal Forum bad I kyrtong ka INC ba iakhun ia ka elekshon MDC Kong Banikas Laban hynne ka sngi Thohdieng, kila iakynduh ia u Deputy Commissioner ka West Jaintia Hills ban kyrpad ba un tuklar lem halor ka ejahar bala mudui da ki paid Karbi pyrshah ia i kong Banikas.
Ka jingkynduh ka long ban kyrpad ia une u khliehduh ka WJH district un iakren lem ia u Deputy Commissioner bad Superintendent of Police ka Karbi Anglong ba kin phah weng noh ia ka ejahar bala mudui hapoh ka Jrikyndeng Police Station.
Lah ban kdew hangne ba I Kong Banikas Laban ila mih ban iakhun ia ka elekshon JHADC ba dang shu dep na ka seng Congress na 12 Barato-Mukroh constituency.
U bah Chandame Sungoh Chairman ka HBDRF u iathuh ba ki paid Karbi kila ujor ba ine i Longkmie i dei iba shong ha ka shnong Mowluber ia kaba ki kam ba i dei i nongshongshnong ka Karbi Anglong. Kila ujor ba kumno kum ka nongshong shnong ka Karbi Anglong kala mih ban iakhun ia kane ka eleksjon.
Une u Nongialam ka HBDRF ula ong ba ka Mowluber ka dei kaba dang hap hapoh ka West Jaintia Hills District bad I Kong Banikas i dei i nongshongshnong ba pura ka Meghalaya bad la pynshisha ia kane lyngba ki kot ki sla, ia kaba ka Election Commission ka Ri India bad ki bor pyniaid elekshonn ka Meghalaya kila pynksan da ka jingailad ba kin iakhun ia ka elekshon.
Ka HBDRF ka kyntu ia u Deputy Commissioner ka WJH ba un shimkhia mardor halor kane ka kam khnang ba kan ym ktah eiei ia ka leit ka wan jong ine I Longkmie bad ka Shnong kaba ishong i sah.
Ha kajuh ka por, ka HBDRF ka dawa ia ki briew kiba donkti ban ujor ia ka ejahar ba ki dei ban weng noh ia kane ka ujor hapoh ka san sngi lem kumta ka Forum kam banse ban shim da ki sienjam kiba kham tyngeh.
