Pynshlur ka NCTE ia ki jaka pule ka Jylla ban sdang ia ka ITEP

Shillong, Rymphang 28: Ka National Council for Teacher Education (NCTE) ka la pynshlur ia ki jaka pule (College/University) hapoh ka Ri ba kin sdang ia ka Integrated Teacher Education Programme (ITEP) na ka bynta ban ai jinghikai iaki ba kwah ban long nonghikai ha ki skul bapher bapher ha kylleng ka Ri.

Ia ka prokram ITEP hapoh ka Ri, la sdang kum ka Pilot Mode (jingpyrshang) ha u snem 2023 tang da ki 24 tylli ki jaka pule (College/University) hynrei ha u snem 2024, ka ITEP ka la kylla long kum ka Mission bad haduh kine ki sngi, ki don 57 tylli ki jaka pule (College/University) kiba la sdang iaka ITEP.

Ïa kane la pyntip da u Chairperson ka NCTE ka Sorkar India, u Prof Pankaj Arora haba iathuh ba ha Meghalaya haduh mynta ki don tang 2 tylli ki jaka pule (College/University) kiba ai jinghikai ïa kito kiba kiba kwah ban long nonghikai.

Kine ki jaka pule ki kynthup ka Kiang Nangbah Government College Jowai West Jaintia Hills kaba la sdang ha u snem 2023 bad ka North Eastern Hill University (NEHU) Shillong East Khasi Hills kaba la sdang ha u snem 2024.

Haba kren bad ki lad pathai khubor, u Prof Pankaj Arora u la ong ba ki jaka pule ha kylleng ka Ri ki lah ban aplai
ïa ka ITEP, la ka long ka Co-ITEP ne ka Specialized ITEP bad katkum ka jingdon ki jingtei bad ki jingdon ki nongai jinghikai ba tbit.

“Lada ki jaka pule ki lah ban pynbiang ia ki kyndon ka NCTE, kita ki jaka pule (College/University) kila lah ban ai aplai ban sdang ia ka ITEP”la u Prof Pankaj.

U Prof Pankaj u la ong ba ka ITEP ka dei ka jingpule 4 Year Dual Major Degree Course bad ha kaba kut jong ka prokram pule, la ai syrnod ia ki samla pule ha ka kyrdan BA bad B.Ed kaba la mynjur da ka UGC.

U la bynrap ba ha ka liang ka pule puthi, ka NCTE ka wanrah ïa ki jingkylla kiba bun jait, ha ryngkat bad ka jingïadei kaba kyrpang jong ka National Education Policy 2020.