Shillong, Rymphang 28: Ka Iingkashari Meghalaya High Court kala aipor lai bnai ia ka District & Session Judge, Shillong ban rai halor ka jingkynnoh ba siew tam haduh T. 9 klur kum ka bai jaka sha ka trai jong ka jaka ba thied na ka bynta ban pynheh ia ka kai liengsuin Umroi.
Ka Iingkashari ba kynthup ia u Chief Justice IP Mukerji bad Justice W Diengdoh ha ka hukum bala pynmih hadien ba bishar ia ka PIL ha ka sngi Balang kala ong, “Ha kum kine ki khep,ngi kyntu ia District & Session Judge, Ri-Bhoi ban phah noh ia ka mukotduna sha District & Session Judge, Shillong kaba dei ruh ka Special Judicial Officer hapoh ka Land Acquisition Act, ka ban shim ruh ia kane ha kaban rai ia ka jingkylli ba mih halor ka jingsiew tam ia ka bai jaka haba bud ia baroh ki rukom treikam hadien ba shim ia ki sakhi satar ba donkam, ban sngap ia ki liang mamla bad ban shim rai hapoh laibnai bap hah ia kane ka hukum”.
“Ka rai jong ka judge ka dei ban poi sha kane ka Iingkashari lyngba ka Ophis jong ka District Court bad ruh ban sam sha baroh ki liang mamla khnang ban pynlah ia ngi ban bishar ia kane ka kam kat kum ka hukum jong ka Iingkashari Surpreme Court. Baroh ki hukum ba shipor jong kane ka mukotduna kin dang treikam kumba long” kala ong haba bthah ia ka Jylla ba kam dei ban pyllait ia ka pisa ba dang sah sa 20% jong ka bai jaka sha ka trai khlem da ioh jingbit na ka Iingkashari.
Halor ka jingkyrpad jong ka Iingkashari Supreme Court sha u Chief Justice da ka hukum ba 2 tarik Nailar 2017, ka High Court kala bthah ia District Judge, Ri-Bhoi ban pynlong ia ka jingtohkit halor kane ka kam.
Ka kaiphod ba-ar jong District Judge Ri-Bhoi kala pynpaw ba ka pisa ba T.25,70,80,258-kaba long 80% jong ka bai jaka la dep ban pdiang da ka trai jaka. Kam don satia ka daw ba ka trai kan sa ioh pdiang ia ka 20% ka pisa ba dang sah.
Kat kum ka kaiphod, ka trai jaka kala ioh tam ia ka pisa haduh T. 9 klur na ka dor iew jong ka jaka.
