Yn ai shuti kyrpang ia ki Nongtrei Sorkar ba kin pynleit jingmut ha ki jingkilan met
Shillong, Feb 26: Katba ka jylla Meghalaya ka dang pynkhreh ban pynlong ia ka National Games kaba 39, ka sorkar jylla kala kular ban bei tyngka bun ha ka kam ialehkai ha kylleng ki shnong ki thaw khnang ba yn lah ban ioh khur bun ia ki takma.
Ha ka National Games kaba 38 kaba la long ha Uttarakhand, ka Meghalaya kala ioh khur 5 tylli ki takma baroh ha ka jingialehkai Canoeing.
Haba kren ha ka jingialang pynkup burom ia kiba ioh khur takma ha ka sngi Balang, u Myntri Rangbah ula pynpaw ia ka jingshimkhia ka sorkar ban tei ia ki jingtei ha ka kam ialehkai bad ruh ban kyrshan ia ki nongialehkai. Hynrei ka jingbei tyngka kaba kham bun eh ka leit na ka bynta ki jaka ialehkai bad ula banjur ia kajingdonkam ban kyrshan ruh ha ki shnong ka long kaei kaei kaba kongsan khnang ba ki nongialehkai kin ioh ban pynkhreh bha ialade na ka bynta ka National Games kaban wan.
“Kawei na ki bynta kiba kongsan kaba ngi lah dep ban ithuh kadei ka jingdonkam ia ki Coach kiba la tbit bha ha ki jingialehkai ki bapher bapher. Bna shimkhia ia kane, ngin kyrshan ia Sports Association ki bapher bapher an sdang ia ki training program kiba kyrpang na ka bynta ki 200-300 ngut ki nongialehkai kiban mihkhmat ia ka Meghalaya ha ka National Games kaba 39” ong u Myntri Rangbah.
Nalor ki jingshimkhia ha ki shnong, ka sorkar kan pynleit jingmut ruh ha kaban kyrshan ia ki nongialehkai kiba trei ha ka kam pulit bad ha kiwei kiwei ki tnad sorkar. Ki Plan ne jingthmu kila don lypa ban ai iaki ia ka shuti kaba kyrpang ia ki kaba 6 bnai haduh 1 snem, ban ailad ia ki ba kin ioh ban pynleit jingmut thik tang ha ka jingpynkhreh ka jongki.
Ha kaba iadei bad ki jingtei, u Myntri Rangbah ula ong, ba ka Meghalaya kala ioh sa tang hapoh jong ka 24 bnai ban pynkheh ia ka National Games, kaba donkam ia ki jaka ialehkai bad kiwei kiwei ki jingdonkam. Ula kyntu ia ki paidbah ka jylla ban kin noh synniang ban pynthikna ba ka jingpynlong ia kane ka lympung iakob kaba jop.
U Myntri Rangbah ula pynbna ba hapoh u snem 2026, bun tylli ki liengsuin kamai kin treikam ne kamai na Shillong Umroi Airport, kaban plie lad ban suk ka leit ka wan jong ki nongialehkai bad ki nongpyniaid. Nalor ka jingtei ia ki jingtei, ka sorkar kan pynmih ruh ia ka plan na ka bynta ban kyntiew ha ka rukom ioh takma jong ka jylla.
“Nga dap da ka jingkmen ban iohi ia u mawnongrim uba ngi lah buh ha ka liang ka kam ialehkai bad ka rukm long rukom man jong ka kam ialehkai ha ka jylla ha kaba mynta kala sdang ban pynmih ia ka resol. La kadei ka kam ialehkai, ka tem ka put ne ka jingsengkam lajong, ki prokram ki bapher ki jong ngi kim dei satia shuh tang ki jingshimkhia ka sorkar hynrei kila long kum ka jingbei tyngka kaba iai bteng na ka bynta ki samla” ula ong.
Haba kren halor ka Meghalaya Outstanding Sportspersons Direct Appointment Policy, ia kaba la mynjur da ka kynhun myntri, u Myntri Rangbah ula ong, ba ki nongioh takma ha ka National, South Asian bad Olympic Games kin ioh beit noh da ka kam sorkar.
“Ia kane ka polisi yn pyntreikam pura noh, kaban long kum ka jingai mynsiem ia ki nongialehkai ha ka jylla ka jong ngi ba kin kiew shaphrang” ula ong.
Haba pynkut ia ka jingkren, u Myntri Rangbah ula ong “Hba ngi ia don hangne kumne ban ialehkmen ia ka jingjop ia ka National Games kaba 38, ngi dei ruh ban don ka jingthmu bad ka jingpynkhreh na ka bynta ka National Games kaba 39. Nga ai khublei ia u Myntri Rangbahduh ka ri, u Myntri kam pohiing ka ri bad ia ka President jong ka Indian Olympic Association ia ka jingkyrshan bad kumjuh ia ka kynhun ka jong ngi kaba la trei shitom, ha kaban pynurlong ia ka jingthmu ba ka Meghalaya kan ioh ban pynlong ia ka National Games ha u 2027”.
