Shillong, Rymphang 23 : Ka Shillong All Faiths Forum (SAFF) kala rai ban pynshlur ia baroh ki dkhot ba kin ai ka jingkyrshan ba pura ia ka Sorkar Jylla ha ka jingiakhun thma pyrshah ia u droks.
Ia kane ka rai la shim ha ka jingialang General body ba long ha Umshyrpi College.
Kane ka jingialang kala mynjur ruh ia ki nongkitkam ba thymmaika SAFF na ka bynta kane ka samoi thymmai ba kynthup ia u Bishop P Lyngdoh kum u President, Naba Bhattacharjee-Vice President, Noor Nongrum-General Secretary, Arup Barua-Asst General Secretary, Jasbir Singh-Treasurer bad Rev Kharkongor kum u Media Assistant.
“Ka SAFF ka phah ruh ia ka jingsngew nguh ia u Myntri ka Tnad Social Welfare bad ka kynhun jong u halor ka jingialang ba dang shen bad ki Nongialam Niam hapoh ka Nongbah” ong u Bah Noor Nongrum, Secretary ka SAFF.
Haba pynpaw ia ka jingshaniah ha ka Tnad Social Welfare bad ka Project DREAM hapoh ka jingialam u Mission Director Bah Francis G Kharshiiing, ki dkhot ka SAFF bad ki Nongialam na kiwei ki niam kila kular ia ka Sorkar ba kin ai ka jingkyrshan ha ka jingpyrshang ban pynduhjait ia u droks napoh ka Jylla lem bad kiwei kiwei ki jingsniew kiba la kynrei ha ka imlang sahlang mynta.
Ka SAFF ka kyrpad ruh ia baroh ki dkhot bad ki Unit ba kin shimkhia ia ki sienjam ban wad ia ki stad ki jhad bad ka jingkyrshan pisa na ka Sorkar hapoh ka DREAM project ba kin pynlong ia ki prokram bapher bapher ha ki jaka jong ki bad ruh ban iasyllok iala ki riewngeit.
U Bah Noor ula pynpaw ruh ba ka SAFF kan sab tin lynti bad kyrshan ia ki dkhot ha ka jingpyrshang jong ki bad kin long shibynta jong kane ka prokram.
 kala rai ban pynshlur ia baroh ki dkhot ba kin ai ka jingkyrshan ba pura ia ka Sorkar Jylla ha ka jingiakhun thma pyrshah ia u droks.){kind=link}