Kut ka ialap elekshon MDC ha ka por 4 baje janmiet | Aiu yn jia ha ki 48 kynta shuwa ka jingthep vote ?

Shillong, Rymphang 19 : Ka jingialap elekshon sha ki artylli ki Autonomous District Council- ka Khasi Hills Autonomous District Council (KHADC) bad Jaintia Hills Autonomous District Council (JHADC) kan kut mynta ha ka por 4 baje janmiet, kaba long thik 48 kynta hashuwa ka jingthep vote.

Ka jingiathep vote ha baroh 29 tylli ki constituency ka KHADC bad JHADC kan long la 21 tarik Rymphang.

Ka 48 kynta shuwa ka jingthep vote, ba ju tip kum ka ‘silence period’ (ka por ban sangeh lut ki jingialap) ka khang ia baroh ki paidbah, ki lad pathai khubor, ki riew sain pyrthei bad kiwei kiwei ba kin leh ia kano kano ka kam ialap elekshon ha kane ka por.

Ia kane la leh khnang ban ailad ia ki nongthep vote ba kin ioh ia ka jingjahthait na ki jingktah jong ka jingialap elekshon, kaban pynlah ia ki ban shim ia ki rai ba da puson haba ki thep vote.

Kumjuh ruh, ha kane ka por jong ka silence period la khang ia baroh ki nongkitkam san pyrthei, ba kin pyndonkam ia ki kali Sorkar, ki kali don light saw bad siren. La mana ruh ban pyndonkam ia ki tynghung.