Shillong, Rymphang 18: U Kyrtong ka UDP na Jaiaw Constituency u Bah Auguster Jyrwa ula ong ba ka jingmih ka jongu ban iakhun ia ka elekshon MDC kadei namar ba u don ia ka nongrim kaba skhem ban shakri ia u paidbah bad iaka jaidbynriew.
U Bah Auguster Jyrwa ula kren ia katei ha ka jingialang paidbah kaba long ha Jaiaw Pdeng ha ka miet sngi Ba-ar hakhmat jong ki paidbah bad ki nongkyrshan kiba la wan sha ka jingialang.
U Bah Auguster ula ong ba ula shakri ia ka ri bad jaidbynriew kum u nongialam ka KSU bad ula shakri ia ka ri lyngba ka seng KSU la palat 18 snem bad mynta u don ia ka jingthrang ban bteng ia ka jingshakri ia u paidbah khamtam ha kaban pynneh pynsah bad ban pynkhlain ia ka jaidbynriew.
“Lada phi ailad ia nga ba ngan long u nongmihkhmat jong phi kum u MDC ka Jaiaw Constituency, ngi dang donkam shuh shuh ban pynkhlain ha ka ban iada ia ka khyndew ka shyiap, ka khaii pateng, ka synshar khaddar, ka shongkha shongman, ka riti ka dustur, ka ioh ka kot, ki Dorbar Shnong, ki Dorbar Raid, ki Dorbar Kur. Kine kidei kiei kiei kiba ngi dei donkam ban leh da kaba pynkhlain bad pynjanai shuh shuh ia ka Sixth Schedule bad ia ka District Council” ong u Bah Auguster.
Ula ong ba ka UDP kala ioh ban ialam 4 snem kynthih ia ka District Council bad kala lah ban mynjur ia ka Regulation of Administration of Land Act 2021 bad la ioh ruh ban thaw ia ki ain jong ka Building Bylaws bad la nang pynkhlain shuh shuh ia ka khaii pateng bad kiwei kiwei ki bynta kiba ka UDP kala ioh ban leh.
U Bah Auguster ula kyrpad ruh ia ki paidbah ba kin kyrshan lem ia u ha ka elekshon bad ban thep ia ki vote ki jongki ban pynjop ia u ha ka elekshon MDC jong ka Khasi Hills Autonomous District Council.
