Nongstoin, Rymphang 13 : Saw ngut ki briew kila iap hashen ha ka jingiatynrah para trok thylli ha ka miet sngi U Blei ha ka surok Shallang, West Khasi Hills.
Kat kum ka khubor Pulit, ki Pulit ka Shallang kila ioh jingtip ha ka por 10:45 baje mynmiet ia kane ka jingjia. La ong ba kawei ka trok saw shaka ba thylli, kaba don u nombor A/F kala hiar sha ka thain Shallang hynrei haba poi ha 5 Kilo bad namar ka jingniah sted palat, kala leit tynrah ia kawei pat ka trok saw shaka ba thylli kaba don u nombor ML08-B-2494 bad hap sha khap.
Ki Pulit ki iathuh ba saw ngut ki briew kila iap ha kane ka jingjia bad uwei na kine kiba iap, la ithuh kyrteng da u Rahul Puwein ba 22 snem na ka shnong Nongriangka, Shallang. Hynrei ia lai ngut kiwei pat, ym pat shym la lah ban pynithuh.
Ki Pulit kila pyndep ia ka post mortem ha Riangdo CHC bad ia une u briew ba ithuh la aiti noh sha ki bahaiing katba ia ki 3 ngut haduh mynta ym pat lah ban ithuh.
Ki Pulit kila register case halor kane ka jingjia ha Shallang Police Station bad ka jingtohkit mynta ka dang iaid shakhmat.
