Kob u DyCM ia ki Liang Pyrshah khamtam ka VPP | Kynnoh ruh ia ka NPP nangno ka pynioh T.38000 Klur ki kam pynroi

Shillong, Rymphang 11: U President ka National People’s Party (NPP) ka Jylla bad Symbud Myntri Rangbah Bah Prestone Tynsong ula kyntu ia ki Liang Pyrshah khamtam ka Voice of the People Party (VPP) ba kin wad nangno ka Sorkar ba ialam ka NPP ka ioh ia ka song pisa ba palat T. 38,000 klur ban pyntreikam ia ki kam pynroi ha baroh ki liang hapoh ka Jylla.

“Kila kynnoh laiphew jait pyrshah ia u Bah Prestone bad pyrshah ia u Conrad hynrei nga kwah ban ai jingmut ia ki ba kin kynnoh ruh ba nangno ka NPP, Prestone bad Conrad ki lute ban wanrah haduh katne ki kam pynroi ha Meghalaya. Ki dei ban wad nangno ngi ioh da ki hajar klur ka pisa na ka bynta ka roi ka par ka Jylla” ong u Bah Prestone haba kren ha ka rynsan ialap elekshon ha Shnong Umthli ban pan jingkyrshan ia u Kyrtong ka NPP na Langkyrdem-Laitokroh Bah Rahboklang Tynsong ha ka miet sngi Nyngkong.

“Naduh ka sngi ba ngi shimti ia ka Sorkar ha Meghalaya, ngi la lah ban wanrah ym duna ia ka T.38000 klur ban pynthikna ia ka roi ka par ha baroh ki liang lyngba ki Tnad bapher bapher jong ka Sorkar na ka bynta ka bha ka miat ki paidbah ka Jylla. Hynrei, ka long kaba sngewsih ban iohi ia ki manifesto jong kiwei ki seng sainpyrthei khamtam ka party ba dang shu mih thymmai kaba la seng tang ban kynthoh pyrshah ia ki kam ba bha jong ka Sorkar” ula byntap.

U bah Prestone ula kular ruh ba ka party jong u kan shim ia ki sienkam ba donkam ban nang pynkhlain ia ki Autonomous District Council (ADC) bad pynkup bor ia ki Khlieh Nongsynshar bad ki Dorbar Shnong, ki Hima lada shah jied ban wan ha ka bor ha ki ADC elekshon, ka ban long la 21 tarik Rymphang.

“Ngi kwah ban nang pynkhlain ia ka dustur bad ka roti ba riew spah jong ki paidriewlum trai muluk, ka hok halor ka khyndew ka shyiap bad ka synshar Shnong synshar hima da kaba pynkupbor ia ki Hima bad Dorbar Shnong. Hynrei, ka long kaba sngewsih ban iohi bad iohsngew ba don ki briew kiba byrngem ban ujor ejahar pyrshah ia ki Dorbar Shnong (kaba th thmu ban pyntlot ia ki) hynrei nga ong ha phi ba wat ka ECI ka ai ka bor bad jingithuh ia ki Dorbar Shnong ha ka por ka elekshon” ula ong.

Ula buh jingkylli ruh ia ka jingpyrshang ban pyntlot ia ka riti aijait kmie da kiwei ki seng sain pyrthei khamtam ” kito kiba pynshlur ia ki paidbah ban shim jait na u Kpa. kaei ka ban jia ia ki pateng ban wan jong ngi lada ngi ailad”.

“Kumta, nga kyrpad ia ki paidbah ba kin ym shah ialam bakla bad ba kim dei ban ailad ban pyntlot ia ka riti ka dustur ba riewspah jong ngi” ula bynrap.

U Bah Prestone ula kam ruh ba ka Sorkar ba ialam da ka NPP ha ryngkat ka Executive Committee ha KHADC kala mynjur ia ka Land Act ban iada ia ka hok halor ka khyndew ka shyiap jong ki trai ri trai muluk bad ong “Ngi kwah ban pynkhlain shuh shuh ia kane ka ain”.

“Kila don ki jingpyrshang ban ialam bakla ia ki paidbah bad ka NPP kala shimkhia bha ia kane ka kam.Watla ki jingkynnoh ki mih pyrshah ia ka NPP, ngi la nang khlain. Ngi la lah ban ai ka Sorkar kaba shlem. Shuwa u 2018, ki jingpynkhyllem Sorkar ki jur bha hynrei naduh ba shimti ka NPP ia ka Sorkar, ka kam pynkhyllem sorkar kala jah” ula ong haba bynrap” Kane ka dei namar kam ju don ka jingiashrut hapoh ka NPP ym kum ha kiwei pat ki seng sain pyrthei khamtam ka seng sain pyrthei ba thymmai (VPP) ka don ka jingiapait ka pra hapdeng ki MLA kaba lam sha ka jingbym ia sngewthuh jingmut ha ka jingia ai ticket ha kane ka elekshon ADC”.

Une u Heh ka NPP ula kren ruh halor ka jingmih ki seng sainpyrthei kum ki tit kaba la nang phiah bad pyniapaid iapra ia ki paidbah ka Jylla.

“Nga dang pyrkhat ba ka seng sain pyrthei ba dang mih thymmai (VPP), kaba jop 4 ngut ki MLA, jin ba ki iatreilang bad ka UDP, HSPDP- kila jan ioh ia u nombor ban thaw sorkar hynrei namar ba ki ieid Jaidbynriew shaba palat pud, ki jied ban pharia ia ka Jaidbynriew ( da kaba seng ia ka seng sain pyrthei ba thymmai). Namar kata ka dhong ha phi ban bishar. Nga lah mih na ka congress bad leit sha ka NPP. Nga sngew ba phi baroh phi dei ban wan shakhmat bad kyrshan ia ka NPP namar ngi dei ka party kaba iatylli, ta ka daw ki jingkyrkhu kila wan tuid hapoh ka Jylla Meghalaya”.

Nalor kane, u Symbud Myntri Rangbah ula ong ba ka Sorkar kala kular ban ai kam sorkar ia lai ngut ki nongialehkai kiba dang shu ioh khur ia ka takma bad wanrah nam ia ka Jylla na ka 38th National Games.

“Ngi pynshlur ia ki samla ba kin paw ha ki kam ialehkai. Hynrei, ki don ki party kiba kam ba lada ki paidbah ki jied ia ki, kin sa aikam hynrei nga ong ba wat ju ngeit ia ki namar ki shu pynbiej ia phi” ula ong.

Kat kum ka jingong jong u, ka Sorkar kala pynleit jingmut haba pynkhlain ia ki SHG ban pynkupbor ia ki kynthei. Ka jingdon ki SHG kala kiew na ka 5000 sha ka 50000 tang ha kine ki 7 snem.