Elekshon KHADC |Pyllait ka KHNAM ia ka manifesto ba 15 tylli ki mat hakhmat ki nongiakhun laitluid

Bam smai ki kyrtong ban ym phet seng lada long MDC

Shillong, Rymphang 10: Ka Khun Hynniewtrep National Awakening Movement (KHNAM) hynne ka sngi ka la pyllait paidbah Manifesto ba 15 tylli ki mat naka bynta ka elekshon MDC sha KHADC, ka ban long ha ka 21 tarik Rymphang.

Hashuwa kane, ka KHNAM kala pynkular ruh ia baroh 11 ngut ki kyrtong hakhmat ki dur mot jong ki 3 ngut ki nongialeh laitluid ka Jylla kata U Kiang Nangbah, U Tirot Sing Syiem bad u Patogan Sangma ha State Central Library.

Kine ki kyrtong kila bam smai ba hadien ba kila jop iaka ilekshon, kim dei ban phet seng bad kin treikam katkum ki nongrim ka KHNAM.

Ha ka Manifesto, ka KHNAM kala kular ba kan pynthikna ia ka jingsynshar kaba khuid bad ban shim ia ki sienjam ban pynkhlain ia ka Sixth Schedule sha ka Riti Synshar ka ri India nalor ba kan dawa ban weng noh mardor ia ka Para 12 (A) na ka Sixth Schedule bad ban iada ia ka bor synshar shimet jong ka district council. Ka dawa ruh ban pynkylla noh mardor ia ka Scheduled Tribe Order 1950.

Ka KHNAM ka pynthikna ruh ban pynbeit ryntih ïa ki aiñ riti dustur bad ki rukom treikam jong baroh ki Hima bad ki Elaka bad ban kyntiew ïa ka jinglong jingman ha ka liang ka pisa tyngka jong ka KHADC katba ka la pynskhem ïa ka jingdonkam ban ïoh ïa ki jingtip ba shisha shaphang ki bhah pisa (Royalty) na ki marpoh khyndew kiba rit bad kiba heh nalor ban pynduh noh ïa ki jinglum khajna beaiñ lyngba ki Hima bad ka Council.

Ka la kular ban pyntreikam hok ia ka Trading by Non-Tribal Regulation, 1954 ban iada ia ka khaii pateng bad ka khaii pateng jong ki riewlum da kaba wanrah ia ki jingpynkylla kiba donkam ban pynthikna ba nym ai License ia ki khaii pateng ba lah ban pyntrei hi daki Khasi.

Ka la ban jur ruh ia ka jingdonkam ban pynbeit ryntih ia ka jingtreikam jong ki Hima/Elaka katkum ka ain da kaba kdew ba ka ain kam shah ia ki bym dei Khasi ban long khlieh nongsynshar, kaba jia ha ki shnong ki thaw da kaba bynrap ba ka la dei ka por ban buh ia ka polisi thungkam thungkam kaba shai ha KHADC. Ka seng ka la pynthikna ruh ba kan nym kynran dien na kano kano ka jingkitkhlieh na ka bynta ka jingmyntoi bad jingbit jingbiang jong ki trai ri trai muluk.

Haba kren sha ki lad pathai khubor u Working President ka KHNAM u Bah Thomas Passah u la ong ba ka seng kan pynthikna ruh ba ka bor ban ai ia ki syrnod Scheduled Tribe (ST) kan wan biang sha ka KHADC lada shah jied ha ka bor synshar.

“Ka la don ka jingpyndonkam bakla ia ki Scheduled Tribe Certificate (ST) ba la ai da ka Sorkar Jylla. Kumta lada shah jied ngin pynthikna ba ka bor ban ai ïa ka Certificate ST kan wan biang sha ka District Council khnang ban pynthikna ba ki jingdonkam ki don ha ka jaka ban Apply” la ong u Bah Thomas.

U Bah Thomas u la ong “Kham bunsien, phi donkam nyngkong eh ïa ka Certificate jaitbynriew Khasi hynrei kane kam shym la pyntreikam bha. Lada ngi phai biang sha ka Notification jong u snem 1975 jong ka Tribal Affairs Ministry, ki don shibun ki kyndon kiba kdew ba ki bor ba ai ki dei ban bud ryntih ïa ki kyndon kiba pyrkhing bha bad lada lap ba ki bor ki ai kum kine ki certificate khlem da bud ryntih ïa ki kyndon kin ngat ha ka jingpynshitom”.

Halor ka jingpynrung kyrteng iaki jaka, u Bah Thomas u la ong “Katkum ka para 3 jong ka Sixth Schedule, ka khyndew ka dei ka sobjek jong ka District Council hynrei ngi la ïohi ba ka sorkar jylla lyngba ka jingpynbna jong ka ha u snem 1982 ka la bthah ba dei ban pynrung kyrteng ïa ki jaka ha ka ophis jong u deputy District Commissioner (DC) bad ngi shim noh ïa kane kum ka bor jong ka distrik. Namarkata, ngin pynthikna ba dei ban pynrung kyrteng ïa ki jaka bad ka KHADC ban pynthikna ba kan ym don kano kano ka jingïakajia pud namar ngi la ïohi ha ka khep jong ka Block I & II, ka jingïakajia jaka kam dei satia bad ka Assam hynrei ka dei bad ka Karbi Anglong Autonomous Council (KAAC)”.

“Haba pule bniah ïa ka aiñ khyndew ba la mynjur dang shen da ka KHADC, ngi lap ba kam shym la pynbor ïa ki paidbah ban pynrung kyrteng ïa ki jaka jong ki ha ka Council. Kumta ki briew ki dang lah ban Register ia ki jaka jong ki la ka long ha ka Council ne ha ka ophis jong ka DC. Kumjuh ruh ka Land Act ka long kaba eh khyndiat namar ka la kdew ba donkam ia ka NOC na ka shnong bad ka Hima ban rejistar ia ki jaka bad ngi lap ba ka don ka jingbamsap ha kum kane ka rukom. Ka KHADC ka la buh ba hapoh 5000 sq ft, ka Dorbar Dhnong ka lah ban shim T.500 bad ka Hima T.2000 kum ka bai lutksan bad ka KHADC kan shim katto katne ka bai lutksan. Wat la kam long kaba rem dor hynrei ka shnong bad ka hima kim iaid katkum ka ain khyndew. Namar kane, ki briew ki kham sngewtynnad ban Register ïa ki jaka jong ki ha ka ophis jong ka DC ha ka jaka jong ka District Council” u la ong.