Shillong, Rymphang 09 : Ka Indian Olympic Association (IOA) bad ka Sorkar Pdeng, kila ai ka jingmynjur ba ka Meghalaya kan dei ka Jylla ka ban ioh pynlong (host) ia ka lympung ialehkai ba heh duh ka Ri-ka 39th National Games ha Jylla ha u snem 2027.
Ia kane la pyntip da u Myntri ka Tnad ialehkai ka Jylla Bah Shakliar Warjri hynne ka sngi U Blei, uba la pyntip ba ka IOA bad ka Sorkar kala phah ktien sha ka Jylla ia kane ka jingmynjur ban pynlong ia ka National Games ha Meghalaya.
Haba pyntip sha ki lad pathai khubor, u Myntri u iathuh “Ha u bnai Nohprah, nga la ioh ban iakynduh ia u Myntri ki kam ialehkai ka Ri Mansukh Mandaviya ha Delhi. Na ka liang ka Sorkar Jylla hapoh ka jingialam u Myntri Rangbah Conrad K Sangma, ngi la ioh ban ai ia ka shithi ban pynlong ia ka National Games ha Meghalaya”.
Ula ong ba ka jingwan ka National Games kan ai jingmyntoi bha ia ki khun samla ka Jylla kiba ieid ia ki kam ialehkai haba kyntu “Ka Sorkar bad ma nga ngin iatrei shitom na ka bynta ki samla kiba ieid ia ki kam ialehkai bad kyrmen ruh ba ki samla ba ieid ia ki kam ialehkai kin shim ia kane ka kabu, kin shim ia kane ka rynsan bad trei shitom ia kaban ngin ioh ban wanrah bad khur ia ki takma ha kane ka National Games”.
Ha kajuh ka por u Bah Shakliar u la pynpaw ka jingai khublei ia baroh ki samla ialehkai kiba la wanrah nam rah burom ia ka Jylla Meghalaya da kaba ioh khur takma na ka lympung National ba dang iaid sha khmat ha Jylla Uttarakhand.
