Shillong, K’lyngkot 6: Ka jylla Meghalaya kala ioh khur 5 tylli ki takma ha ka 38th National Games ba long ha Uttarakhand, ha ki jingiakob kinglieng bapher bapher.
U Indra Sharma 15 snem ka rta na Ri-Bhoi ula ioh ia ka takma rupa ha ka jingiakhun ha ka Men’s Slalom C1 Event kaba la long ha ka sngi Balang da kaba iakhun pyrshah ia ki nongiashimbynta kiba la tbit bha.
Ka Kiran Devi & B. Anandhi, jong ka Assam Rifles Rowing node, kila ioh ia ka takma rnong ha ka Lightweight Women’s Double Sculls bad hynne ka sngi Palei sa ar ngut ki nongialehkai kial jop ha ka Kayaking bad Canoeing.
Ka Elizabeth Vincent kala ioh ia ka takma rupa ha ka Women’s Kayak Cross Extreme Slalom Event bad u Vikash Rana ula long u nongialehkai uba nyngkong jong ka jylla ban ioh khur ia ka takma ksiar ha ka Men’s Kayak Cross Extreme Slalom Event.
U Vikash uba la don 23 snem ka rta uba la pyntbit ialade ha kane ka jingialehkai mynta la 4 snem ula ioh ia ka jinghikai kaba pura na ka Association ka jongu.
Ka Elizabeth Vincent, 26 snem ka rta kadei kaba la khur ia ki khusnam ha ki jingiakob ki bapher bapher kaba kynthup ia artylli ki takma rnong ha ka Asian Canoe Championships ha u 2024. Kadei ruh kaba iadonbynta ha ka kynhun ialehaki jong ka ri India ha ki jingiakob ki bapher. Ka Meghalaya Canoe Association kala ieng rangbah ha kane ka jingiakob ha kaba 4 ngut na ki nongialehkai ki jongka kiba la ioh rung ha kane ka lympung kila ioh khur ia ki takma.
Ka jingjop jong kane ka Association kala long ka nuksa kaba khlain ia ka jingiatreilang jong ki nongialehkai, ki nongpyniaid bad ka jingkyrshan kaba ki ioh na ka tnad ialehkai jong ka jylla.
Ka Jylla Meghalaya mynta kala ia ryngkat ha ka jingioh khur ia ki takma ha ka National Games kaba la long ha u snem 2007 ha Assam ha kaba ka jylla kala ioh khur 5 tylli ki takma.
Ki nongialehkai ka jylla kiba la ioh khur ia ki takma ki kynthup ia Vikash Rana uba la ioh ia ka takma ksiar ha ka Men’s Kayak Cross Extreme Slalom, ka Elizabeth Vincent kaba la ioh ia ka takma rupa ha ka Women’s Kayak Cross Extreme Slalom, u Indra Sharma uba la ioh ia ka takma rupa ha ka Men’s Slalom C1 Event, u Pynshngain Kurbah uba la ioh ia ka takma rnong ha ka Men’s Slalom K1 Event, ka Kiran Devi & B. Anandhi kiba la ioh ia ka takma rnong ha ka Lightweight Women’s Double Sculls.
Kine ki nongialehkai kiba la ioh khur ia ki takma kin sa ioh pdiang ia ka song tyngka, ka scholarship bad kiwei kiwei ki khusnam na ka Tnad Sports and Youth Affairs ka jylla.
Kumba la pynbna da u Myntri Rangbah ka jylla u Conrad K Sangma, ka jylla kan sa shimkhia ruh katkum ka Sports Policy ka jylla ban tyrwa kam sorkar ia kine ki nongialehkai kiba la ioh khur ia ki takma.
