Shillong, Rymphang 03 : U Chief Executive Member (CEM) ka Khasi Hills Autonomous District Council (KHADC) Bah Pyniaid Sing Syiem ha ka sngi Nyngkong, ula batai antad ba ka Voice of the People Party (VPP) kan rem kput bha kham tam ha ki constituency jong ki 4 ngut ki MLA kane ka party, ha ka elekshon ADC ban long la 21 tarik Rymphang.
Kat kum ka jingong jong u, ka VPP kan shah rem ha ki Constituency ba don ki MLA jong ka namar ki paidbah kila dep mad bad sngewthuh ia ki jingbakla.
“Phin sa iohi khamtam eh ha ki constituency jong ki 4 ngut ki MLA ka VPP (Nongkrem, Mawlai, Mawryngkneng bad North Shillong), baroh na ki, kin rem kput bha namar ki paidbah kila mad ia ki jingeh. Shuwa ban jop ia ka elekshon, kila kular ia ka bneng ka khyndew hynrei hadien ba ki shah jied, kila pulom ban pynurlong ia ki. Kumta, ki paidbah kin ym artatien ban ka jubab ha kane ka elekshon MDC” ong u Bah Pyniaid haba iakren bad ki lad pathai khubor hadien ba dep thep kyrteng kum u kyrtong ka NPP na Nongthymmai Constituency hynne ka sngi Nyngkong ha ISBT, Mawiong.
Ia u Bah Pyniaid la synran da ki Nongialam jong ka Confederation of the North East Council ba mihkhmat ia ki 10 tylli ki Autonomous District Council (ADC) hapoh ka thain Shatei Lam Mihngi nalor ki nongkitkam bad ki nongkyrshan ka NPP. Kiba la iadonlang ki kynthup ia u Chief Executive Member (CEM) ka Bodoland Territorial Council, ka Karbi Anglong Autonomous District Council (KAAC) bad ka Tripura Territorial Council (TTC).
Kat kum ka jingong jong u, ka jingpynbiej jong ki social media kala long shaba palat haduh ba ki paidbah kila shah ialam bakla ha ka elekshon ba dang shu dep. “Hynrei mynta ki paidbah kila ioh jinghikai bad kin sa ai ia ka jubab ” ula bynrap.
Halor ka jingdawa ka VPP ia ka Article 371, une u Khliehduh ka KHADC ula ong “Lada ki paidbah ha Eastern Nagaland, kaba la treikam ka Article 371, ki dang wah shane ban iakynduh ia ngi namar ba ki kwah ia ka Sixth Schedule kumta sngewbha bishar fi ba kaei kaba kham kongsan bad kham khlain ia ngi ki jaka riewlum”.
Haba kyntu ia ki paidbah ka Ri-lum Khasi Jaintia ban thep vote da ka jingstad, u Bah Pyniaid ula ong “Nga kyntu ia ki paid ban ban vote ia ki kyrtong, kiba kah shisha ban treikam haba buh ha ka jingmut jingpyrkhat ba ka kam jong u MDC ka dei kaba eh bha khamtam haba phai sha ka jingtyrwa ban pynkylla ia ka Sixth Schedule ha Parliament. Nga kyrpad ia ki paidbah ba ki dei ban kyrshan ia ki kyrtong, kiba lah ban treikam haba buh ha ka jingmut jingpyrkhat ia ka jingdonkam jong ngi ban nang pynkhlain shuh shuh ia ka Sixth Schedule ka Riti Synshar ka Ri India ban iada ia ki riewlum trai ri trai muluk”.
U Bah Pyniaid ia mynta u dang bat kum u MDC ka Sohryngkham.
Haba kylli halor ka rai ban leit iakhun na ka constituency thymmai, u Bah Pyniaid ula ong “Hadien ka jingkhlad noh kynsan kynsan jong u MDC ka Nongthymmai Bah Latiplang Kharkongor, kiba bun ki briew kila wan bad kyrpad ia nga ban iakhun noh na kane ka Constituency. Haba nyngkong, nga la kyntait namar nga la shakri ia ka Sohryngkham la bun snem. Hynrei, shuwa ba ngan shim ia ka rai, nga la iakynduh ia ki nongialam bad ruh ia I hynrei kynthei bad ki bahaiing hasem u Bah (L) Latiplang bad kila ai ka kyrkhu kyrdoh ia nga bad ai shibun ki jingkyrmen ba ngan wan iakhun noh na Nongthymmai. Ngi iatip lut ba lada u Bah Latiplang u dang im, kan long leh nohei wat ban pyrkhat ha kaban wan iakhun elekshon na Nongthymmai namar da lei lei ruh ngim ym ju pyrshah ia u”.
 ka Khasi Hills Autonomous District Council (KHADC) Bah Pyniaid Sing Syiem ha ka sngi Nyngkong, ula batai antad ba ka Voice of the People Party (VPP) kan rem kput bha kham tam ha ki constituency jong ki 4 ngut ki MLA kane ka party, ha ka elekshon ADC ban long la 21 tarik Rymphang.){kind=link}